Ekologııa mınıstrligi Aqbulaq ózeniniń lastanýy boıynsha shaǵymdy tekserip jatyr

NUR-SULTAN. QazAqparat – Ekologııa, geologııa jáne tabıǵı resýrstar mınıstrligi Nur-Sultandaǵy Aqbulaq ózeni boıynsha tekserý jumysyn bastady. Buǵan deıin atalmysh ózenniń lastanǵany týraly halyqtan shaǵym túsken bolatyn, dep habarlaıdy QazAqparat tilshisi.

Nur-Sultan qalasyndaǵy Aqbulaq ózeniniń lastanǵany týraly áleýmettik jelilerdegi aqparattarǵa baılanysty tekserý bastalǵan. Naqtyraq aıtqanda 2020 jylǵy 13 qazanda «Qazgıdromet» RMK Nur-Sultan qalasy boıynsha Ekologııalyq monıtorıng departamenti Qorshaǵan orta lastanýynyń monıtorıng zerthanasynyń qyzmetkerleri birqatar núkteden jospardan tys sý synamalaryn alǵan.

«Atap aıtqanda qurylys alańynan 0,5 shaqyrym joǵary, temirjol kópiriniń janynan, ekinshiden qala turǵyndary túsirgen orynnan (qurylys alańyna qarama-qarsy), úshinshiden qurylys alańynan 0,5 shaqyrym tómen, avtomobıl kópiriniń astynda, A.Pýshkın kóshesi men Sh.Qudaıberdiuly dańǵylynyń qıylysynan alyndy», - dep habarlaıdy Ekologııa jáne geologııa, tabıǵı resýrstar mınıstrliginen.

Mınıstrlik jer ústi sýlarynyń sapasyn taldaý 42 fızıkalyq-hımııalyq kórsetkish, atap aıtqanda basty ıondardy, bıogendi, organıkalyq jáne beıorganıkalyq zattar, aýyr metaldar boıynsha júrgizilgenin jarııa etti.

«Shekti ruqsat etilgen normadan asyp ketý - ottegin, ammonıı ıonyn, tuzdylyqty, kaltsıı men hlorıdterdi hımııalyq tutyný kezinde tirkeldi. Bul sý qoımasynyń organıkalyq zattarmen jáne sýǵa tán qospalarmen lastanǵanyn kórsetedi. Aqparat Ekologııa, geologııa jáne tabıǵı resýrstar mınıstrliginiń Ekologııalyq retteý jáne baqylaý komıtetine jiberildi. Qazirgi ýaqytta 5 táýlik ishinde ottegini bıohımııalyq tutyný boıynsha taldaý júrgizý jalǵasýda, nátıjeler qosymsha usynylady», - dep habarlaıdy mınıstrlikten.