Ekologııa mınıstrligi Abaı oblysyndaǵy órt týraly: eldi mekenderge qaýip tónip turǵan joq

ASTANA. QazAqparat - Qazirgi ýaqytta Abaı oblysynda úsh baǵytta (ońtústik, batys jáne shyǵys jıekte) órtti sóndirý jumystary jalǵasýda. Mıneraldandyrylǵan jolaqtar jasaý jumystary qıyn bolýyna baılanysty toqtatyldy. Eldi mekenderge qaýip joq.

Bul málimetterdi búgin QR Ekologııa jáne tabıǵı resrýstar mınıstrligi Telegram kanalyna jarııalady, dep habarlaıdy QazAqparat.

Órtti sóndirýge TJM, Orman sharýashylyǵy komıtetinen, jergilikti atqarýshy organdardan jáne Qorǵanys mınıstrliginen 1 500-ge jýyq adam, 300-den astam birlik tehnıka jumyldyrylǵan.

Sonymen qatar, órt aýmaǵyn aerovızýaldy tekserý jáne órt oshaqtaryna áýeden sý tógýdi júzege asyrý úshin 14 tikushaq tartyldy. Órtti sóndirý jumystary bastalǵannan beri órt oshaqtaryna áýeden 777 ret sý tógildi, jalpy kólemi 2000-nan astam tonnany quraıdy.

Keshe meteojaǵdaıdyń ózgerýine baılanysty (jeldiń ekpini sekýndyna 18 metrge deıin) órt tómengi bólikte órbip órt oshaǵynan Talıtsa aýylyna (turǵyndar aldyn ala evakýatsııalandy) qaraı baǵyt alyp, aýyldy qorǵaýǵa órt tehnıkasy jumyldyrylǵan bolatyn. Órt Talıtsa aýylynyń shyǵys jaǵynan dalaǵa qaraı órbip, órt sóndirildi.

Tótenshe jaǵdaılar mınıstri general-maıor Syrym Sháriphanov oqıǵa ornynan órt sóndirý jumystaryn úılestirýde.

Qazirgi ýaqytqa deıin jedel jelige 104 qońyraý tústi. TJM jáne TJD jedel jeli telefondary: 8 7172 53 32 84, 8 722 235 38 31.

«Qazgıdromet» AQ derekteri boıynsha 11 maýsym kúni: jaýyn-shashynsyz, soltústik-batys, soltústik 9-14 m/s jel, ekpini 15-20 m/s bolady dep kútilýde, kúndiz aýa temperatýrasy 25-30 0S.

13 maýsymda: jaýyn-shashynsyz, soltústik-batys, soltústik 9-14 m/s jel, ekpini 15-20 m/s deıin bolady dep kútilýde, aýa temperatýrasy túnde 12-170 S, kúndiz 27-32 0S.