Ekologııa mınıstri Jańa sý kodeksiniń negizgi baǵyttaryn atady

NUR-SULTAN. QazAqparat – Búgin Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev Jańa sý kodeksiniń negizgi baǵyttaryn atady, dep habarlaıdy QazAqparat tilshisi.

«Jańa sý kodeksin ázirleý maqsatynda Mınıstrlik tarapynan retteýshilik saıasattyń konsýltatıvtik qujaty daıyndaldy. Ol boıynsha qoǵamdyq talqylaý bastaldy. Sarapshylardyń qatysýymen tıisti jumys toby quryldy. Sondaı-aq, jańa Sý kodeksiniń tujyrymdamasyn ázirleýge kiristik», - dedi S. Brekeshev Úkimet otyrysynda.

Jańa sý kodeksiniń negizgi baǵyttary mynadaı:

Birinshi. Eldiń sý-resýrstyq áleýetin saqtaý.

Ekinshi. Sý paıdalanýshylardy sý únemdeý tehnologııalaryn paıdalanýǵa yntalandyratyn tetikterdi aıqyndaý.

Úshinshi. Sý sharýashylyǵy ınfraqurylymyn damytýdy qoldaý úshin memlekettik-jekeshelik áriptestikti qoldanýdy yntalandyratyn tarıf belgileý modelin qurý.

Tórtinshi. Qazaqstannyń sý resýrstary áleýetin esepke alý jáne boljaý, monıtorıngileýdi tsıfrlandyrý, sondaı-aq, sý resýrstaryn basqarýdaǵy ǵylymnyń rólin arttyrý.

Besinshi. Ulttyq zańnamany halyqaralyq quqyq qaǵıdattarymen úılestirý.

«Jańa sý kodeksiniń jobasyn Parlament Májilisine kelesi jyldyń jeltoqsan aıynda engizýdi josparlap otyrmyz», - dedi mınıstr.