Ekologııa mınıstri Túrkistan oblysyndaǵy sý nysandarynyń jaǵdaıymen tanysty

NUR-SULTAN. QazAqparat - Ekologııa, geologııa jáne tabıǵı resýrstar mınıstri Serikqalı Brekeshev jumys saparymen Túrkistan oblysyna bardy, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń Telegram kanalyna silteme jasap.

Mınıstr Túrkistan oblysynda jergilikti turǵyndarmen kezdesip, ońtústik óńirdegi ózekti problemalardyń biri – sý máselesine talqylady.

Mınıstr aldymen «Túrkistan magıstraldy kanalyna» baryp, kanal arnalaryn betondaý jumysymen tanysty. Kanal uzyndyǵy 149 km quraıdy jáne jergilikti sharýa qojalyqtarynyń negizgi sý kózi bolyp tabylady. Júrgizilip jatqan jumystyń mańyzdylyǵyna toqtalǵan Serikqalı Brekeshev joba aıaqtalǵan soń sý shyǵyny azaıatynyn habarlady. 2020 jyly bastalǵan qurylys jumystary keler jyly aıaqtalyp, paıdalanýǵa beriledi.

Sondaı-aq Eski Iqan aýyldyq okrýginde «Irrıgatsııalyq jáne drenajdyq júıelerdi jetildirý jobasy» aıasynda júrgizilip jatqan jumystarmen tanysty. Joba aıasynda 72 dana tik drenajdy uńǵyma jáne 300 shaqyrymǵa jýyq kanal jańǵyrady. Serikqalı Brekeshev qurylys qarqynyn jyldamdatyp, josparǵa saı aıaqtaýdy tapsyrdy.

Serikqalı Brekeshev artynsha óńirdegi sý tasqyny máselesin sheshýge septigin tıgizgen «Kóksaraı» sý rettegishiniń búgingi kúıin baıqady. «Qazsýshar» RMK Túrkistan fılıalynyń dırektory Kerımjanov Merlan 2011 jyly qoldanysqa berilgen kontrrettegish jańǵyrtýdy qajet etedindigin jetkizdi. Jańǵyrtý maqsatynda daıyndalǵan jobany mınıstrge tanystyryp, mamandarmen talqylady. Aıtylǵan pikirlermen men usynystar eskerilip, jobalaý jumystary jyl sońyna deıin usynylatyn boldy.

Jumys sapary aıasynda Túrkistan oblysynyń ákimi Ómirzaq Shókeev, EGTRM Sý resýrstary komıtetiniń tóraǵasy Nurlan Aldamjarov, «Qazsýshar» RMK bas dırektory Altaı Eljasovpen birge Shardara sý qoımasyna bardy. Jergilikti turǵyndarmen tildesip, sý sharýashylyǵyna qatysty ózekti máselelerdi talqylady. Turǵyndardy 50 jyldan asqan sý qoımasynyń qaýipsizdigi alańdatady. Mınıstr Serikqalı Brekeshev qoımany jańǵyrtý jumysymen aınalysyp jatqan merdiger kompanııaǵa qurylys jumystaryn belgilengen ýaqytta aıaqtaýdy tapsyrdy. Sondaı-aq jobada kórsetilgen qarajattan asyp, artyq shyǵyn keltirmeýdi mindettedi.

Shardara sý qoımasynda júzege asyrylyp jatqan jóndeý, seısmoturaqtylyǵyn arttyrý jumystary 2022 jyly aıaqtalady. Qurylys aıaqtalǵan soń 7 baldyq jer silkinisine shydas beretin tózimdilikke ıe bolady.

Sondaı-aq mınıstr Serikqalı Brekeshev jumys sapary aıasynda jergilikti balyq sharýashylyǵy salasynyń kásipkerlerimen kezdesti. Óńirdegi balyq óndirisiniń qarqynyn baıqap, ulǵaıtý maqsatynda memleket tarapynan qolǵa alynyp jatqan jobalardy tanystyrdy.