Ekologııa mınıstri transshekaralyq ózender boıynsha kelissózderdiń barysyn baıandady
Parlament Senatynyń jalpy otyrysynda depýtat Nurtóre Júsip transshekaralyq ózenderge baılanysty suraq qoıdy.
«Orhýs konventsııasyna Reseı Federatsııasy,Ózbekstan jáne Qytaı memleketteri qol qoımaǵan. Qazaqstannyń transshekaralyq ózenderiniń barlyǵynyń bastaýy osy memleketterden alady. Olar qol qoımaǵan jaǵdaıda, Qazaqstannyń áreketi qandaı bolady?» - dep surady senator.
«Rasynda da siz aıtqan memleketter Orhýs konventsııasyna qosylmaǵan. Degenmen biz transshekaralyq ózenderdiń máselesi óte ózekti bolǵannan keıin, biz bul memlekettermen ekijaqty qarym-qatynasta jumys istep kele jatyrmyz. Bul tetik jaqsy damyǵan, biz osy baǵytta jumystady nyǵaıtamyz», - dedi M. Myrzaǵalıev.
Onyń sózine qaraǵanda, transshekaralyq ózender boıynsha Qytaımen 2015 jyldan beri kelissóz júrgizilip keledi. Osy oraıda, ózen aǵynyn bólý jáne birlesken rejım tańdaý sharalary eskerilgen.
«Aıta ketetin jaıt, Qytaımen tórt jyldyń ishinde mátinniń tek 25 paıyzyn kelistik. Kelissózder ońaı emes. Degenmen, Qazaqstan Qytaı kórshileriniń arasynda transshekaralyq máseleni talqylap jatqan jalǵyz el. Bul Elbasynyń Qytaı basshylyǵymen qol jetkizgen kelisimshartqa aıasynda iske asyrylyp keledi. Sonymen qatar, jaqynda Reseı tarapymen Jaıyq máselesi boıynsha tıisti sheshim bolady dep oılaımyz, kelesi jyldan bastap birlesken zertteý jumystaryn jasaımyz. Atap aıtqanda, Reseımen, Ózbekstanmen arada zańnamalyq baza bar», - dedi M. Myrzaǵalıev.
Budan buryn habarlanǵandaı, búgin Parlament Senatynyń jalpy otyrysynda palata depýtattary «Aqparatqa kirý, sheshimder qabyldaý protsesine jurtshylyqtyń qatysýy jáne qorshaǵan ortaǵa qatysty máseleler boıynsha sot ádildigine qol jetkizý týraly konventsııaǵa Lastaýyshtardyń shyǵaryndylary men tasymaldarynyń tirkelimderi týraly hattamany ratıfıkatsııalaý týraly» Zańyn qabyldandy.
Osy Hattamaǵa qosylý maqsaty Orhýs konventsııasynyń erejelerimen negizdelgen.