Ekologııa mınıstri kıikterdiń popýlıatsııasyn zertteýge qarjy bólýdi surady

NUR-SULTAN. QazAqparat – Úkimet otyrysynda QR Ekologııa, geologııa jáne tabıǵı resrýrstar mınıstri Serikqalı Brekshev kıik popýlıatsııasyn tyńǵylyqty zertteýge qarjy surady, dep habarlaıdy QazAqparat tilshisi.

«Kıik popýlıatsııasyn retteý týraly aıtsaq, keshe biz ǵylym men salalyq qaýymdastyqtardyń qatysýymen jınalys ótkizip, ortaq sheshimge keldik.

Birinshi. Tereń monıtorıng júrgizip, kıik polpýlıatsııasyn tıimdi retteý úshin kúrdeli ǵylymı zertteýler júrgizý qajet. Bıyl Zoologııa ınstıtýty Ǵylym jáne joǵary bilim mınıstrligine osy taqyryp boıynsha zertteýler júrgizý úshin ótinim bergen edi. Ókinishke qaraı, bul joba qabyldanbady. Osyǵan baılanysty, Álıhan Ashanuly, Ǵylym jáne joǵary bilim, Qarjy mınıstrlikteri osy zertteýlerdi qarjylandyrýdy bıyldan bastap qarastyrýyn suraımyz», - dedi Serikqalı Brekeshev.

Sondaı-aq, mınıstr kıikten zardap shekken sharýalardyń máselesin de kóterdi.

«Atalmysh zertteýler júrgizilip, onyń qorytyndysy shyqqanǵa deıin sharýalarǵa kelgen zalaldy esepteý ádistemesi ázirlenip, ótemaqy tóleý máselesi pysyqtalady», - dedi ol.

Eske salsaq, keshe Prezıdent atalǵan vedomstvonyń jumysyna birneshe syn aıtyp, Serikqalı Brekeshevke sógis jarııalaǵan edi.