Ekologııa mınıstri Qazaqstanda taqtatas munaıyn óndirý týraly aıtty

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Qazaqstanda taqtatas munaıyn óndirý múmkindigi týraly suraqqa jaýap berdi, dep habarlaıdy QazAqparat tilshisi.

«Ótken aptada bolǵan dóńgelek ústel otyrysynda taqtatas munaıyn tıisti qor quramyna engizý máselesi qaralǵan edi. Ázirge memlekettik balansta bul qor eskerilmeı otyr. Qazirgi kezde jer qoınaýy týraly zańnamada, zańǵa táýeldi aktilerde osyndaı qordy esepke alýdyń ádistemesi qarastyrylmaǵan. Sondyqtan bul másele pysyqtalyp jatyr», - dedi S. Brekeshev Senattyń jalpy otyrysynan keıin tilshiler saýalyna jaýap bere otyryp.

Onyń aıtýynsha, atalǵan máselede Qazaqstannyń mıneraldy-shıkizattyq bazasyn arttyrýǵa yqpal etetindeı múmkindikter bolsa, mınıstrlik bul saladaǵy usynystardy qarastyrýǵa ázir.

Osy oraıda tilshiler taqtatas munaıyn óndirý qorshaǵan ortany lastaýǵa qanshalyqty qaýip tóndiretinin surady.

«Bul óz kezeginde munaıdy óndirý tehnologııasyna qatysty. Qazirgi kezde tehnologııalar damyp jatyr. Barlyq ekologııalyq ári tehnıkalyq talaptardy saqtasa, qorshaǵan ortaǵa keri áser etetin jaǵdaılar bolmaıdy dep oılaımyn. Alaıda ár joba boıynsha jekeleı pysyqtaý kerek ekeni túsinikti», - dedi mınıstr.