Ekologııa mınıstri Kaspıı teńiziniń tartylýy jaıynda pikir bildirdi

ASTANA. QazAqparat – Ekologııa jáne tabıǵı resýrstar mınıstri Zúlfııa Súleımenova Kaspıı teńiziniń tartylýyna qatysty pikir bildirdi, dep habarlaıdy QazAqparat tilshisi.

Zúlfııa Súleımenovanyń aıtýynsha, qorshaǵan orta men halyqtyń ómir súrý sapasyn jaqsartýǵa qatysty mınıstrliktiń óz jospary bar.

Degenmen mınıstr moıyndaǵandaı, atalǵan baǵyttaǵy máseleler keshendi ári kúrdeli.

«Jaqynda Kaspıı teńiziniń tartylýy týraly beınejazba shyqty. Ótken jyly qarashada Jaıyq ózeniniń teńizge quıatyn tusyn kórip, tartylý barysyna ózim kýá boldym. Sondyqtan bul másele boıynsha alda óte úlken mindet tur», - dedi Zúlfııa Súleımenova Jibek Joly telearnasynyń efırinde.

Odan bólek, vedomstvo basshysy ekologııalyq jaǵdaıdy turaqtandyrý, ekojúıe degradatsııasyn tejeý, aýa sapasyn jaqsartý, qatty turmystyq jáne kommýnaldyq qaldyqtardy basqarý júıesine qatysty aýqymdy istiń kútip turǵanyn jetkizdi.

«Joǵaryda atalǵan mindetter buǵan deıin de boldy. Desek te máseleni sheshý jolyn jańasha ári ınnovatsııalyq turǵydan jandandyratyn bolamyz»,- dep tolyqtyrdy Z. Súleımenova.

Buǵan deıin mınıstr elimizde eko-mádenıetti damytý josparyn bólisken edi.

Odan bólek, efır barysynda Qazaqstanda atom elektr stansasyn salýda qoǵam pikiri eskeriletini aıtyldy.