Ekologııa mınıstri egis alqaptary sýmen qalaı qamtamasyz etilip jatqanyn aıtty

ASTANA. QazAqparat – Búgin Úkimet otyrysynda Ekologııa jáne tabıǵı resýrstar mınıstri Zúlfııa Súleımenova elimizdiń ońtústik óńirlerindegi egis alqaptaryn sýmen qamtamasyz etýge qatysty túsinik berdi, dep habarlaıdy QazAqparat tilshisi.

Keıingi jyldary sýarmaly eginshiligi damyǵan elimizdiń ońtústik aımaqtarynda sý tapshylyǵy qatty sezilip otyr. Mınıstrlik bıylǵy vegetatsııalyq kezeńiniń turaqty ótýin qamtamasyz etý úshin 2022 jyldyń jeltoqsanynan bastap daıyndyq jumystaryn bastady. 2022-2023 jyldardyń vegetatsııaaralyq jáne vegetatsııalyq kezeńderindegi jumys jospary bekitildi. Onyń aıasynda qazir kelesi baǵyttardy qamtıtyn syrtqy jáne ishki is-sharalar iske asyrylyp jatyr. Birinshiden, fermerlerdi sýmen jáne joǵarǵy aǵysta ornalasqan sý qoımalarynan qosymsha sý jiberýdi qamtamasyz etý boıynsha irgeles memlekettermen tıisti kelissózder iske asyrylyp otyr. Ekinshiden, gıdrotehnıkalyq qurylystardaǵy jóndeý ári qalpyna keltirý jumystary jalǵasyp jatyr

, - dedi Z. Súleımenova.

Mınıstrdiń aıtýynsha, qazir sýarý júıesiniń magıstraldyq jáne sharýashylyq kanaldaryn tazalaý jumystary qamtylǵan. Budan bólek, sý únemdeý tehnologııalaryn engizý qarastyrylǵan.

Birinshi baǵyt boıynsha, 10 mamyrda Dýshanbe qalasynda Memleketaralyq úılestirý sý sharýashylyǵy qomıssııasynyń 84-shi otyrysy aıasynda Naryn-Syrdarııa sý qoımalary kaskady jumysynyń boljamdy rejımi kelisildi. Soǵan sáıkes Shardara sý qoımasyna vegetatsııalyq kezeńde keletin sý 4,2 mlrd tekshe metrdi quraýy tıis. «Dostyq» kanaly boıynsha 920 mln tekshe metr kóleminde sý berý josparlanǵan. Qazirgi kezde josparlanǵan sý jiberý kestesi tolyq kólemde oryndalmaı jatyr. Bul rette mınıstrlik bekitilgen kestege sáıkes keletin sýdy qamtamasyz etý boıynsha seriktestermen tıisti jumysty jalǵastyryp otyr

, - dedi mınıstr.

Sonymen qatar 22 maýsymda Qazaqstan - Tájikstan - Ózbekstan úsh jaqty formatynda bıylǵy maýsym-tamyz aılaryna arnalǵan «Bahrı-Tochık» sý qoımasynyń jumys rejıminiń kestesi bekitildi. Onyń aıasynda «Dostyq» kanalynyń qazaqstandyq bóligine qosymsha 490,8 mln tekshe metr sý keledi dep qarastyrylǵan.

Shý jáne Talas ózenderiniń basseınderi boıynsha memleketaralyq paıdalanýdaǵy sý sharýashylyǵy obektileriniń sý berý kesteleri bekitildi. Máselen, 2023 jyldyń vegetatsııalyq kezeńinde Shý ózeni boıynsha jalpy keletin sýdyń kólemi 153,95 mln tekshe metr bolsa, Talas ózeni boıynsha - 178,42 mln tekshe metr

, - dedi vedomstvo basshysy.