Ekologııa mınıstri baǵynyshty qyzmetkeri jemqorlyq jasaǵan basshy jumystan ketetinin eskertti

NUR-SULTAN. QazAqparat - Ekologııa mınıstrligine qarasty komıtetter 2 apta ishinde saladaǵy sybaılas jemqorlyqqa qarsy is-qımyl boıynsha naqty usynys berýi tıis. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev vedomstvonyń keńeıtilgen alqa otyrysynda aıtty, dep habarlaıdy QazAqparat tilshisi.

«Ótken jyldyń sońynda Qazaqstan Respýblıkasynyń Prezıdenti Zańǵa qol qoıdy. Zańda memlekettik organdardyń birinshi basshylary, ortalyq jáne jergilikti memlekettik organdardyń derbes qurylymdyq bólimsheleriniń basshylary laýazymdaryn atqaratyn memlekettik qyzmetshiler ózderine tikeleı baǵynyshty memlekettik qyzmetshilerdiń sybaılas jemqorlyq qylmystar jasaǵany úshin jaýapkershiligi kózdelgen. Baǵynyshty adamdar sybaılas jemqorlyq qylmysyn jasaǵan jaǵdaıda komıtetterdiń basshylary, sondaı-aq aýmaqtyq bólimsheler men vedomstvolyq baǵynyshty uıymdardyń basshylary qyzmetinen bosatylady. Osyǵan baılanysty komıtetterdiń, sondaı-aq aýmaqtyq bólimsheler men vedomstvolyq baǵynyshty uıymdardyń basshylary sybaılas jemqorlyq quqyq buzýshylyqtarǵa jol bermeý jóninde barlyq qajetti sharalardy qabyldaýy tıis», - dedi mınıstr.

Onyń aıtýynsha, salalardy tsıfrlandyrýdy, ruqsat berý rásimderin jetildirý men avtomattandyrýdy, ákimshilik kedergilerdi azaıtýdy eskere otyryp, sybaılas jemqorlyqqa qarsy is-qımyl jasaý tásilderin tolyq ózgertý jáne eleýli túrde qaıta qaraý qajet. Osyǵan oraı mınıstr komıtet tóraǵalaryna eki apta ishinde jetekshilik etetin salalardaǵy sybaılas jemqorlyqqa qarsy is-qımyl boıynsha naqty usynystar berýdi tapsyrdy.

«Ótken jyly Memleket basshysy Úkimet pen halyq arasyndaǵy dıalogty qamtamasyz etýdiń negizgi maqsaty - «Halyq únine qulaq asatyn memleket» tujyrymdamasyn iske qosty. Bizdiń mınıstrlik halyqpen, turǵyndarmen tikeleı jumys isteıdi. Biz ashyq memlekettik organ bolýǵa tıispiz. Osyǵan baılanysty vıtse-mınıstrlerge, komıtet tóraǵalaryna óńirlerge shyqqan kezde problemalyq máseleler boıynsha azamattardy qabyldaýdy, buqaralyq aqparat quraldary jáne áleýmettik jelilerde keńinen jarııa etýdi tapsyramyn», - dedi Maǵzum Myrzaǵalıev.

Sonymen qatar ol komıtetter men olardyń aýmaqtyq bólimshelerine saıttaryn sapaly jumys isteýin qamtamasyz etýdi tapsyrdy.

«Jergilikti jerlerdegi aýmaqtyq bólimshelerdiń basshylary azamattardy apta saıynǵy negizde saıttarda jáne áleýmettik jelilerde tikeleı translıatsııalaı otyryp qabyldasyn», - dedi ol.