Ekologııa kodeksi: Jańa tehnologııa engizgen kásiporyn ekologııalyq tólemnen bosatylady
«Biz daıyndaǵan Ekologııa kodeksiniń jobasy Májiliske barmaı turyp, taý-ken óndirisi kásiporyndary qaýymdastyǵynyń, «Kazenergy» munaı-gaz jáne energetıka kesheniniń, «Atameken» ulttyq kásipkerler palatasy men bıznestiń ózge de ókilderiniń maquldaýynan ótken. Biz reformany keıinge qaldyratyndaı eshqandaı syltaý joq dep oılaımyz. Óndiristiń ekologııalızatsııasyna jyldar boıy ınvestıtsııa salyp kelmeı, endi karantınniń saldaryn alǵa tartýdyń qajeti joq», - dedi Ahmetjan Pirimqulov OKQ-da onlaın rejımde ótken baspasóz máslıhatynda.
Vıtse-mınıstr óz sózinde halyq pen ónerkásip ókilderin alańdatyp otyrǵan negizgi máselelerge toqtaldy.
«Birinshiden, óndiristi ekologııalızatsııalaý máselesi týraly aıtaıyn. Ekologııalyq kodeks barshaǵa ashy ári jańa tehnologııalarǵa qol jetkizýdi kózdeıdi. Bul normany engizgen kezde jańa tehnologııalar óndiristik kásiporyndarǵa belgili bir shyǵyn keltiretinin bildik. Alaıda onsyz bolmaıtynyn túsinemiz. Qazirgi tańda jańa tehnologııalar – Temirtaý, Óskemen, Balqash, Qaraǵandy sekildi qalalarda qorshaǵan ortanyń sapasyn qorǵaýdyń birden-bir joly. Bul mehanızm 2025 jyldan bastap engizile bastaıdy. Aldymen barlyq emıssııanyń 70 paıyzyn shyǵaryp otyrǵan Qazaqstandaǵy iri 50 kásiporyndy qamtıdy», - dedi ol.
Ahmetjan Pirimqulov jańa tehnologııalardy engizgen kásiporyndar ekologııalyq tólemderdiń keıbirinen bosatylyp, tıisinshe olarǵa salynatyn ekologııalyq somalardyń mólsheri óspeıdi. Únemdelgen aqshany kásiporyndar óz óndirisin jańartýǵa jumsaı alady. Bul rette Ahmetjan Pirimqulov Ekologııa, geologııa jáne tabıǵı resýrstar mınıstrligi kásiporyndarǵa edáýir jetkilikti ýaqyt berip otyrǵandyǵyn aıtty.
«Ekologııa kodeksiniń jobasynda jańa tehnologııalardy engizýden bas tarqan kásiporyndardy jabý týraly norma joq. Bizde tek emıssııa úshin tólemdi kezeń-kezeńimen kóterý jospary bar», - dedi ol.