Ekologııa kodeksi: Qazaqstanda «lastaýshy tóleıdi jáne túzetedi» qaǵıdaty engiziledi

NUR-SULTAN. QazAqparat – Elimizde qorshaǵan ortany qorǵaý maqsatynda «lastaýshy tóleıdi jáne túzetedi» qaǵıdaty engiziledi. Bul týraly QR Ádilet mınıstriniń orynbasary Aqerke Ahmetova málim etti, dep habarlaıdy QazAqparat tilshisi.

«2021 jylǵy 2 qańtarda jańa Ekologııalyq kodeks qabyldandy, ol boıynsha «lastaýshy tóleıdi jáne túzetedi» qaǵıdatyn iske asyrý kózdelgen. Sol sekildi ekologııalyq zańnama men talaptardy buzǵany úshin jaýapkershilikti qatańdatý qarastyrylǵan. Túziletin qaldyqtardyń kólemin qysqartý maqsatynda «Waste to Energy» qaldyqtardy energetıkalyq kádege jaratý tetigin engizý jónindegi zań qabyldandy. Qoqys jaǵatyn zaýyttar salý úshin Nur-Sultan, Aqtóbe, Almaty, Shymkent, Qaraǵandy jáne Óskemen qalalary anyqtaldy», - dedi A.Ahmetova OKQ-de ótken baspasóz máslıhatynda.

Odan bólek, vıtse-mınıstr elimizdegi azamattardyń beıbit jıyndarǵa qatysýy jáne erkin pikir bildirý quqyqtary týraly sóz qozǵady.

«2020 jylǵy maýsymda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jańa zań kúshine endi. Zań beıbit jınalystardy uıymdastyrý jáne ótkizý tártibin ózgertedi jáne olardy ótkizýge ruqsat alý rásimin jeńildetedi. Qylmystyq kodekstiń «Jala jabý» 130 baby qylmyssyzdandyryldy jáne «Áleýmettik, ulttyq, rýlyq, násildik, tektik-toptyq nemese dinı alaýyzdyqty týdyrý» 174-baby izgilendirildi», - deıdi ol.

Buǵan deıin Ádilet mınıstri orynbasary Aqerke Ahmetova Qazaqstanda adam quqyqtaryn qorǵaý boıynsha BUU usynymdarynyń qalaı júzege asyp jatqanyn aıtqan edi.