EKO kómegimen Qazaqstanda 28 myń sábı dúnıege keldi

NUR-SULTAN. QazAqparat – Densaýlyq saqtaý mınıstrligi táýelsizdik jyldarynda ekstrakorporaldy uryqtandyrý (EKU) baǵdarlamasy arqyly neshe bala dúnıege kelgeni týraly málimet berdi, dep habarlaıdy QazAqparat tilshisi.

«Qazaqstan Respýblıkasynda ekstrakorporaldy uryqtandyrý baǵdarlamasy qolǵa alynǵanyna 27 jyl boldy. Osy kezeńde 100 myńnan astam ana kómekke júginip, 28 500 bala dúnıege keldi», - dep jazylǵan mınıstrliktiń QazAqparat saýalyna joldaǵan jaýabynda.

Vedomstvonyń málimeti boıynsha, álemde EKU arqyly dúnıe esigin ashqan adamnyń sany 10 mıllıonnan asyp otyr.

«EKU arqyly dúnıege kelgen balalardyń densaýlyq jaǵdaıynyń tabıǵı jolmen qursaqqa bitken balalardyń densaýlyǵynan aıyrmashylyǵy joq. Balanyń densaýlyǵyna ata-anasynan beriletin tuqym qýalaıtyn qasıetter, ananyń júktilik jáne bosaný kezindegi kúıi áser etedi», - dep jazylǵan jaýapta.

Eske salsaq, QR Prezıdenti Qasym-Jomart Toqaev Joldaýda 2021 jyldan bastap elimizde «Ańsaǵan sábı» arnaýly baǵdarlamasyn iske qosýdy tapsyryp, «EKO» baǵdarlamasymen kvotany 7 myńǵa deıin, ıaǵnı 7 ese kóbeıtý mindetin qoıǵan edi.