EKO-ǵa kvotany arttyrý arqyly otbasylardy saqtap qalýǵa bolady – Juldyz Omarbekova

ALMATY. QazAqparat – Jatyrdan tys uryqtandyrýǵa (EKO) kvotalardy kóbeıtý arqyly eldegi demografııalyq ósimdi jaqsartyp, otbasylardy saqtap qalýǵa bolady. QR Májilisiniń depýtaty Juldyz Omarbekova Prezıdenttiń búgingi Joldaýyna qatysty osyndaı pikir bildirdi, dep habarlaıdy QazAqparat tilshisi.

Depýtat Memleket basshysy kótergen otbasylyq-demografııalyq ahýalǵa toqtaldy.

«Prezıdenttiń búgingi Joldaýy mazmundy boldy. Úlken reformalardy qajet etetin kóptegen bastamalar aıtyldy. Otbasylyq máseleler jónindegi burynǵy vıtse-mınıstr retinde jas otbasylar úshin qýandym. EKO baǵdarlamalary aıasynda kvota sany kóbeıetin boldy. Onyń sany 7 myńǵa deıin jetedi, ıaǵnı 7 ese kóp. Bul – balaly bolýdy armandaıtyn otbasylarǵa úlken kómek», - dedi depýtat.

Sonymen qatar, ol Q.Toqaev barlyq sala boıynsha tıimdi sheshimder usynǵanyn atap ótti.

«Memleket basshysy tıimdi ári qurylymdyq sheshimder usynyp otyr. Barlyq mindetter popýlızmnen naqty is-áreketterge aýysady. Biz adamdardyń ómirin jaqsartý úshin aldymyzǵa naqty mindetter qoıýdamyz. Qasym-Jomart Toqaev – halyq únine qulaq asatyn bilimdi Prezıdent. Prezıdent búgin qazaqstandyqtardy mazalaıtyn barlyq negizgi problemalardy atady. Aldaǵy ýaqytta Memleket basshysynyń barlyq tapsyrmalary oryndalady degen úlken úmit bar», - dep qorytyndylady Juldyz Omarbekova.