Ekinshi dúnıejúzilik soǵystan oralmaǵan atyraýlyq bozdaqtyń súıegi týǵan jerine jerlendi

<p>ATYRAÝ. KAZINFORM &mdash; Atyraý oblysynan Ekinshi dúnıejúzilik soǵysqa attanyp, oralmaǵan bozdaqtyń biri &mdash; Qısym Ádıev. Onyń súıegi Atyraý qalasyndaǵy &laquo;Noǵaı&raquo; zıratyna jerlendi.&nbsp;</p>

Soǵys dalasynan oralmaǵan Qısym Ádıev 1942 jyly habar-osharsyz ketken. Onyń súıegin «Fenıks» jasaǵynyń izdeýshileri Reseıdegi Smolensk oblysy, Temnın aýdanyndaǵy Batıýshkovo aýylynyń mańynan tapqan.

Foto: Atyraý óńirlik kommýnıkatsııalar qyzmeti

Uly Sembaı Qısymovtyń aıtýynsha, ákesi 1911 jyly týǵan. Ol soǵysqa ketkende artynda áıeli men uly qalǵan. 

«Ákem soǵysqa attanǵanda, men eki jasta bolyppyn. Ókinishke qaraı, ákem soǵystan oralmaı, habar-osharsyz ketti. Onyń bir deregi shyǵar dep, kútip júr edim. Meniń ákemdi izdeýshiler medalony arqyly anyqtaǵan. Ákemniń súıegin elimizdiń áýe qorǵanysy kúshteri arnaıy áskerı-kólik ushaǵymen jetkizdi. Búgin ákemniń súıegin kindik qany tamǵan óńirde jer qoınyna tapsyrdyq. Áskerıler maǵan ákemniń kaskasy men medalin tapsyrdy. Bular — ákemnen qalǵan qundy jádigerler. Ony otbasymyzdyń tórinde saqtaımyz», - deıdi uly Sembaı Qısymov. 

Eske sala ketelik, buǵan deıin Atyraýǵa maıdanda qaza tapqan jaýyngerdiń súıegi jetkizilgeni habarlanǵan edi.