Ekinshi dúnıejúzilik soǵysta qaza tapqan jaýyngerdiń jeke zattary Otanyna oraldy

QARAǴANDY. QazAqparat – Qaraǵandyda Ekinshi dúnıejúzilik soǵys ardageri Smaǵul Serikbaevtyń týystaryna onyń reseılik «Pıoner» izdeý jasaǵy tapqan jeke zattary tabys etildi, dep habarlaıdy QazAqparat tilshisi.

Smaǵul Serikbaev 1942 jyly tamyzda Kalının oblysy Rjev aýdany Belkovo aýyly úshin shaıqasta qaza tapqan. Jaýyngerdiń jerlengen jeri ótken jyldyń kúzinde tabyldy.

«Ekinshi dúnıejúzilik soǵystyń aıaqtalǵanyna 75 jyldan astam ýaqyt ótti. Biraq Reseıde izdeý jumystary áli de jalǵasýda. Mine, osylaı «Pıoner» toby jaýynger Smaǵul Serikbaevtyń medalony, medali jáne jeke zattaryn tapty. Іzdeý toby olardy Ekinshi dúnıejúzilik soǵys kezinde joǵalyp ketken qazaqstandyq sarbazdardy júıeli izdeýmen aınalysatyn «Atamnyń amanaty» QB-ne tapsyrdy», – dedi Qaraǵandy ákiminiń orynbasary Nurlan Bıkenov.

Smaǵul Serikbaevtyń jaqyndary uzaq jyldar boıy Ekinshi dúnıejúzilik soǵysynda janyn qıǵan týysqanynyń qaıda jerlengenin bilýge tyrysyp baqqan.

«Meniń ákem Smaǵul aǵanyń jıeni. Ol ony uzaq ýaqyt izdedi, hat jazdy, tipti Reseıge bardy. Jaqynda bizge qońyraý shalyp, jerleý orny, medal jáne jeke zattar tabylǵanyn habarlady. Men izdeýge qatysyp, kómekteskenderdiń barlyǵyna jáne osy zattardy bizge bergenderge alǵys aıtamyn. Bul estelik. Biz atamyzdyń ómiri men ólimi týraly áńgimelep, bul zattardy urpaqtan-urpaqqa óz balalarymyzǵa, nemerelerimiz ben shóberelerimizge beretin bolamyz», – dep bólisti jaýyngerdiń týysy Amantaı Serikbaev.