Ekinshi dúnıejúzilik soǵysta qaza tapqan eki áskerdiń súıegi týǵan jerine qaıta jerlenbek

ASTANA. QazAqparat - Astanada Qarýly kúshterdiń Ulttyq áskerı-patrıottyq ortalyǵynda 1941-1945 jyldardaǵy Ekinshi dúnıejúzilik soǵysta qaza tapqan qazaqstandyq jaýyngerlerdiń súıegin jaqyndaryna tapsyrýǵa arnalǵan saltanatty rásim ótti, dep habarlaıdy QR Qorǵanys mınıstrliginiń baspasóz qyzmeti.

Oǵan Qorǵanys mınıstrliginiń ókilderi, Qarýly kúshterdiń ardagerleri, «Atamnyn Amanaty» QB, «Áskerı-patrıottyq jáne izdestirý qozǵalysy qaýymdastyǵy» RQB ókilderi, Qarýly kúshter Ulttyq áskerı-patrıottyq ortalyǵynyń áskerı qyzmetshileri qatysty.

Beınekonferentsbaılanys rejıminde ótken sharaǵa Petropavl qalasy men Jetisý oblysy Alakól aýdany ákimdikteriniń ókilderi qosyldy.

– Búgin Uly Otan soǵysy maıdandarynda qaza tapqan qazaqstandyq jaýyngerler týǵan topyraǵyna oraldy. Habarsyz ketkenderdiń taǵdyry olardyń urpaqtaryn áli kúnge deıin alańdatady. Olar atalary men ákelerinen qandaı da bolsa habar kútedi. Urpaǵy úshin óz ómirlerin qurban etken barlyq jaýyngerler máńgi esimizde, – dep atap ótti Tárbıe jáne ıdeologııalyq jumys departamentiniń bastyǵy ádilet polkovnıgi Tileýhan Basqojaev.

Іzdestirýshilerdiń erik-jigeriniń arqasynda eki qazaqstandyq qyzylásker: 1913 jyly týǵan Ivan Sýrnın men 1903 jyly týǵan Fılıpp Parasenkonyń taǵdyry belgili boldy.

117 jeke atqyshtar brıgadasynyń qyzyláskeri Ivan Fılıppovıch Sýrnındi «Pokolenıe» izdestirý jasaǵynyń izdeýshileri Tver oblysy, Olenın mýnıtsıpaldy okrýgi, Dronıcheno eldi mekeninen tapqan. Ol Soltústik Qazaqstan oblysynyń Presnov aýdandyq áskerı komıssarıatynan shaqyrylǵan.

Almaty oblysynyń týmasy Fılıpp Lavrentevıch Parasenkonyń súıegin aımaqtyq «Frontovye dorogı» áskerı-patrıottyq izdeý klýbynyń izdeýshileri izdep tapqan. Ol Almaty oblysynyń Alakól aýdanynan shaqyrylǵan.

Soltústik Qazaqstan oblysynda Ivan Sýrnınniń nemeresi Galına Samsonova turady.

– Atamyzdyń Otanyna oralǵany úshin Qorǵanys mınıstrligi men reseılik izdeýshilerge shyn júrekten alǵys aıtamyn. Atamyz qyzynyń janyna jerlenetin bolady. Anam ákesiniń aýyr shaıqasta qaza tapqanyn biletin. Ol bul týraly soǵystan aman oralǵan atamnyń qarýlas dosynan estip bilgen, – deıdi Galına Tarasovna.

Ókinishke qaraı, Fılıpp Lavrentevıch Parasenkonyń týystary áli tabyla qoıǵan joq. Ony qaıta jerleýmen Jetisý oblysy Alakól aýdanynyń ákimdigi aınalysatyn bolady.

Qaıta jerleý rásimderi óńirlerde áskerı qurmetpen ótedi.