Ekinshi dúnıejúzilik soǵysqa qatysqan qazaqtar týraly qujattar kitap bolyp shyqty
Búgin Satbayev University oqý ornynyń qabyrǵasynda «Ekinshi dúnıejúzilik soǵystaǵy qazaqtar: sheteldik muraǵattardaǵy qujattar, 1 tom» jınaǵynyń tusaýy kesildi.
Іs-shara Táýelsizdik kúnine arnalyp jáne «Rýhanı jańǵyrý» baǵdarlamasyn júzege asyrý aıasynda ótkizildi. Sonymen qatar, Prezıdenttiń «Uly dalanyń jeti qyry» maqalasynda aıtylǵan «Arhıv-2025» jobasyna júktelgen mindetke negizdelgen.
Birinshi tomda Eýropa elderindegi arhıvterden alynǵan Ekinshi dúnıejúzilik soǵysqa qatysqan qazaqtar týraly málimetter jarııalanǵan. Jınaq 15 sheteldik arhıv jáne Ulybrıtanııa, Frantsııa, Norvegııa, Reseı men Fınlıandııa elderiniń kitaphanalary jáne mýzeılerinen alynǵan qujattardan turady. Sonymen qatar, maıdangerlerdiń jeke muraǵattarynan alynǵan qujattar engen. Materıaldardyń deni alǵash ret jarııalanyp otyr.
Bul eńbekti jazý barysynda qazaqstandyq ǵalymdar tarıhty barynsha júıeli jáne keshendi túrde zertteýge tyrysqan. Jınaq avtorlarynyń biri, tarıh ǵylymdarynyń doktory Gúlnár Meńdiqulova osy syndy eńbekterdiń mańyzyn aıtyp ótti.
«Áskerı adamdardyń aıtýynsha, sońǵy sarbaz úıine jetpese - soǵys bitken joq degen sóz. Tarıhı derekterge súıenetin bolsaq, qazirgi tańda Ekinshi dúnıejúzilik soǵysqa qatysqan qazaqtardyń 350-600 myńy áli habarsyz ketkenderdiń qatarynda bolyp esepteledi. Dál osy oraıda, birinshi tomda jarııalanǵan tizimdegi birneshe myń adam tabylyp, qaıta óz úılerine oralǵany týraly aıtqymyz keledi», - dedi Gúlnár Meńdiqulova.
Atalmysh zertteý jumysy pánaralyq sıpatqa ıe jáne tarıhı ǵylym, áskerı tarıh jáne áleýmettik ǵylymdar baǵyttaryn qamtıdy. Jarııalanǵan qujattar stýdentterge, magıstranttarǵa, doktoranttarǵa, ǵalymdar men tarıhshylarǵa, áskerılerge jáne jalpy Qazaqstan tarıhy men dúnıejúzilik tarıhqa qyzyǵýshylyq tanytatyn adamdarǵa arnalǵan.