Ekinshi deńgeıli bankter Ulttyq qor qarjysynyń basym bóligin qaıtardy - «Samuryq-Qazyna» qory

ASTANA. QazAqparat - Halyq banki Ulttyq qor qarjysyn tolyǵymen qaıtardy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte «Samuryq-Qazyna» AQ Basqarma tóraǵasy Ómirzaq Shókeev málim etti.

Qor ekinshi deńgeıli bankterdiń kapıtalynan shyǵyp jatqandyǵyna toqtalǵan ol, «BTA Bank, Temirbank jáne Alıans Bank jekeshelendirildi. Qazirgi kezde sońǵy qujattar ázirlenip, qol qoıylýda. Meniń oıymsha, bul operatsııalar sátti ótýde. Óıtkeni, jalpy ekonomıkada memlekettik basqarýdan góri jekemenshik basqarý tıimdi bolyp sanalady», - dedi.

Sonymen qatar ol daǵdarys kezinde ekinshi deńgeıli bankterge Ulttyq qordan bólingen qarjynyń qaıtarylýy máselesine toqtaldy.

«Ulttyq qordan bankterdiń kapıtalyna 332 mlrd. teńge quıyldy (BTA Bank, Temirbank, Alıans Bank, Halyq banki jáne Kazkommertsbank). Halyq bankindegi qarjy tolyǵymen qaıtaryldy. Sonymen qatar joǵaryda atalǵan úsh bankten qaıtarylǵan qarjy 200 mlrd. teńgege jýyq. Al Kazkommertsbankte taǵy paketimiz bar jáne osy paketti satqan kezde qaıtarylady dep oılaımyn», - dedi Ó. Shókeev.