Ekinshi deńgeıli bankter múgedek jandardyń bıznesin qoldaýy kerek - kásipker

JAMBYL OBLYSY. QazAqparat - Qazaqstan Prezıdenti Qasym-Jomart Toqaevtyń Jambyl oblysy jurtshylyǵymen kezdesýi barysynda birinshi top múgedegi, jeke kásipker Anar Beksultanova múmkindigi shekteýli jandarǵa bankter tarapynan nesıe berilse degen usynysyn bildirdi. Bul jaıynda QR Prezıdentiniń baspasóz hatshysy Berik Ýálı Feısbýktegi paraqshasynda jazdy, dep habarlaıdy QazAqparat.

«Men osy dúnıege 2 qolsyz kelgen adammyn. Soǵan qaramastan, bul maǵan joǵary oqý ornyn bitirýime, 20 jyl oblystyq tarıhı ólketaný mýzeıinde ekskýrsovod qyzmetin atqarýyma, 5 jyl kóleminde jeke kásipkerlikpen aınalysýyma, 2 qyzymdy tárbıeleýime kedergi bolǵan joq. «Eńbek etseń - emersiń» - deıdi dana halqymyz. Búginde jumys isteımin degen adamǵa eki qolǵa bir kúrek tabylady. Keste tigem, sýret salam, úı sharýasymen tolyq aınalysyp júrmin. Túrli taqyryptardaǵy sýretter kórmesine de qatysyp turamyn. Tek adamda qıyndyqqa moıymaı, umtylys, senim bolsa, kez kelgen aýyrtpalyqty eńserýge bolady. Oǵan meniń kózim tolyq jetti», - dedi ol.

Anar Beksultanova aıaǵymmen tigin tigýdi úırenip, jasaǵan buıymdardy ózi satady. Úıiniń bir bóligin sheberhana etip, kásibin júrgizip otyr. «Bıznestiń jol kartasy» aıasynda 3 mıllıon teńgege ártúrli fýnktsıonaldy 7 óndiristik tigin mashınasyn satyp alyp, kásipker retinde jumysyn jalǵastyrýda. Qosymsha tórt áıeldi de jumyspen qamtyǵan.

«Búgingi kúni memleket tarapynan halyqty áleýmettik qoldaý sharalary keńinen júrgizilýde. Kásip asham degenderge múmkindikter bar. Jaqynda ǵana «Taraz» mıkroqarjy uıymynan kásibimdi keńeıtý úshin taǵy 3 mıllıon teńge nesıe aldym. Munyń barlyǵy - elimizdiń áleýmettik saıasatynyń, árıne sol saıasatty qalyptastyrǵan Nursultan Ábishulynyń úlken qamqorlyǵy dep bilemin», - dedi kásipker.

Sonymen qatar, ol qazirgi tańda múmkindigi shekteýli jandardyń arasynda jumys isteıtin azamattar az emestigin atap ótti.

«Biraq 1-shi, 2-shi toptaǵy múgedekterge kórsetiletin qoldaý kóbine memleket tarapynan. Osyǵan oraı 2-shi deńgeıli bankter arqyly da bıznes ashýǵa jáne keńeıtýge nesıe berý joldary qarastyrylsa, atalǵan azamattardy qoldaý sharalarynyń aýqymy keńeıgen bolar edi», - dedi A.Beksultanova.

Eske salsaq, buǵan deıin QR Prezıdenti jumys saparymen Jambyl oblysyna kelgendigi týraly habarlaǵan bolatynbyz.

Atalǵan óńirge sapar kezinde Memleket basshysy Jambyldaǵy týrıstik salaǵa qatysty tıisti tapsyrmalar bergen edi.