Ekiden asqan astanalyq balalar jumysqa ornalasyp, «jalaqy» ala alady
Astana qalasy ákimdiginiń muryndyq bolýymen 19 tamyz kúni (saǵat 11:00-16:00 aralyǵynda) «Araı» saıabaǵynda «Mamandyqtar qalasy» atty halyqaralyq is-shara ótedi.
«Tórt jyl boıy Ýkraınada ótkizilip kelgen tabysty joba Astanaǵa keldi. «Mamandyqtar qalasynda» 2-18 jas aralyǵyndaǵy balalar qutqarýshy, órt sóndirýshi, kınolog, dáriger, bankır, dıdjeı, akter, model, aspaz sekildi júzden astam mamandyqpen tanysady jáne naǵyz mamandardyń jetekshiligimen sheberlik-sabaqtaryn alady. Bul - balalardyń shyǵarmashylyq áleýetin ashatyn tamasha múmkindik. Astananyń barlyq kishkentaı turǵyndaryn qyzyqty jobaǵa qatysýǵa shaqyramyz», - dedi Astana qalasy kásipkerlik jáne ónerkásip basqarmasynyń basshysy Rysgúl Qaýǵabaeva ákimdikte ótken baspasóz máslıhatynda.
Sonymen birge, baspasóz máslıhatyna joba avtory Tatıana Lıýlka qatysty. Onyń aıtýynsha, ár adam óz súıikti isimen aınalysýy kerek jáne «Mamandyqtar qalasy» balanyń ómirlik mamandyǵyn adaspaı tabýǵa múmkindik bermek.
«Ýkraınada JOO-ny aıaqtaǵan adamdardyń 52 paıyzy óz mamandyǵy boıynsha jumys istemeıdi. Bul árıne qynjyltarlyq jaǵdaı. 2014 jyly ana retinde, bıznesmen retinde jaı ǵana qaıyrymdylyq qoryn emes, «Mamandyqtar qalasy» atty áleýmettik joba ashtym. Munda balalarǵa qoǵamnyń modelin kórsetkim keldi. Árbir qoǵamnyń ustanatyn óz zańy, óz erejesi bolady. Sol sebepti, bizdiń qalashyqta balalarǵa kýálik beriledi, eresek ómirde kýáliksiz jumys isteý múmkin emes. Bul kýálik eńbek kitapshasynyń da rólin atqarady. Balalar jumysqa ornalasýdyń qaǵıdalaryn túsinýi kerek. Eńbekaqysyz da jumys bolmaıdy, sondyqtan árbir jumysy úshin balalarǵa júz teńgeden «jalaqy» tólenedi. Jınalǵan shartty «teńgelerge» balalar qala aýmaǵyndaǵy dúkeninen táttiler men balmuzdaqtar satyp alady. Osylaısha, balalar óziniń qaı salaǵa beıim ekenin baǵamdaı alady jáne eńbek etýdiń mańyzdylyǵyn túsinedi», - deıdi T.Lıýlka.
Aıta keteıik, «Mamandyqtar qalasyna» kirý tegin. Oǵan 2-18 jas aralyǵyndaǵy balalar qatysa alady.
Ótken jyly Ýkraınanyń 25 qalasynda «Mamandyqtar qalasy» jobasyna 326 675 bala qatysqan.