«Ekibastuzjylýenergo» tólegen aıyppul turǵyndarǵa kelgen zalaldan áldaqaıda az - mınıstr

ASTANA. QazAqparat – «Ekibastuzjylýenergo» mekemesi jylý maýsymyn qajetti deńgeıde ótkermegeni úshin tólegen aıyppul kólemi turǵyndarǵa kelgen zalaldan áldaqaıda az. Energetıka mınıstri Almasadam Sátqalıev Úkimet otyrysynda osyndaı málimet keltirdi, dep habarlaıdy QazAqparat tilshisi.

«27 qarashada Ekibastuz qalasynyń jylý jelilerinde kóptegen zaqymdar boldy. Temperatýra kestesi 94 ret oryndalmaǵan. «Ekibastuzjylýenergo» mekemesine qatysty jospardan tys tekserý júrgizilip, ákimshilik jaza qoldanyldy. Bul rette qoldanystaǵy aıyppul sharalary halyqqa keltirilgen zalalmen salystyrǵanda óte az ekendigin atap ótý qajet», - dedi vedomstvo basshysy.

Buǵan deıin Ekibastuzda jylytý maýsymynan keıin jylý jelileri synaqtan ótkiziletini habarlanǵan bolatyn.

Eske salaıyq, byltyr 27 qarashada Ekibastuz JEO-syndaǵy tórt qazandyq isten shyǵyp, qala jylýsyz qalǵan edi.

Aıta ketsek, Ekibastuz JEO-syna 2 760 000 teńge, sondaı-aq 5,5 mln teńge aıyppul salynǵany habarlandy.

Al, Tabıǵı monopolııalardy retteý komıtetiniń baspasóz qyzmeti málim etkendeı, «Ekibastuzjylýenergo» seriktestigine 27,6 mln teńge aıyppul salyndy.