Ekibastuzdyń jylý jelilerinen 109 aqaý tabyldy

EKІBASTUZ. QazAqparat - Pavlodar oblysynyń ákimi Asaıyn Baıhanov Ekibastuz qalasynda jumys saparymen bolyp, JEO-da, sondaı-aq, magıstraldyq jáne kvartalishilik jylýmen jabdyqtaý jelilerindegi jóndeý jumystarynyń barysyn tekserdi. Sonymen qatar, óńir basshysy aldaǵy jylý berý maýsymyna daıyndyq boıynsha jedel shtab otyrysyn ótkizdi, dep habarlaıdy QazAqparat.

Ekibastuz JEO-daǵy qazandyqtar men negizgi jabdyqtardy jóndeý jalǵasýda. Oǵan 270-ten astam adam jumyldyrylǵan.

Jumys bekitilgen kestege sáıkes júrgizilýde. №11, №12, №13, №14, № 15 qazandyq agregattarynda qazandyqtar men ottyqtardyń jaqtaýyn, ekrandyq panelderdi, gaz qubyrlaryn, shań qubyrlaryn jáne t. b. montajdaý jáne qurastyrý jumystary júrip jatyr.

Tamyz aıynyń sońyna deıin 4 jylý magıstralin qaıta jańartýdy aıaqtaý josparlanyp otyr.

Bul ýchaskelerde 120-dan astam adam jáne 48 arnaıy tehnıka jumys isteýde.

Qazirgi ýaqytta jańa jeliler men jylý kameralary ornatyldy, jaqyn arada abonentterdi qosady, sodan keıin mamandar jańa jelilerdi jýý jáne tazartý jumystaryn júrgizedi.

Jelilerdegi búkil dánekerleý jumystary defektoskopııanyń ýltradybystyq ádisimen jasalyp jatyr.

Turǵyn úı qoryn jylý qabyldaýǵa daıyndaý jumystary da belsendi júrgizilýde.

Ekibastuz ákiminiń aqparaty boıynsha daıyndyq aktilerin 643 kópqabatty turǵyn úı (690 úıden) alǵan.

Bul úılerde jylý toraptary men ishki júıelerdi jýý jáne nyǵyzdaý oryndaldy.

490 turǵyn úıde júıeni baptaý oryndaldy, drossel qurylǵylary ornatyldy jáne shaıbalaý júrgizildi.

Ekibastuzdaǵy gıdravlıkalyq synaq qorytyndysy boıynsha jelilerdiń neǵurlym álsiz ýchaskelerinen 109 aqaý tabylǵan.

Búgingi tańda 71 aqaý joıyldy.

Oblys ákimi jylytý maýsymyna daıyndyq máselesin qatań baqylaýda ustaýdy, jumys qarqyny men olardyń sapasyn tómendetpeýdi tapsyrdy.