Ekibastuzdyqtar «Nurly jer» aıasynda baspanaly boldy
Bank baspasóz qyzmeti taratqan aqparatqa sáıkes salymshylarǵa páter kiltin Pavlodar oblysynyń ákimi Bolat Baqaýov pen banktiń oblystyq fılıalynyń dırektory Talǵat Baılov tapsyrdy.
«Basynda bir sharshy metrdiń baǵasy 115 myń teńge bolatyn. Biraq bizdiń bankte salymy bar, ortasha jalaqysy 80 000 teńgeni quraıtyn Ekibastuz turǵyndary úshin bul soma aýyrlaý bolatyn edi. Osy sebepti atalǵan máseleni sheshý úshin oblys ákimdigimen baılanystyq. Aımaq basshysy buǵan túsinistikpen qarady, nátıjesinde klıentterimiz burynǵydan da tómen baǵamen baspana satyp alyp, jańa úıge kirýge daıyndalyp jatyr», - deıdi Talǵat Baılov.
Jańa bes qabatty úı 80 páterden turady. Bul - memlekettik turǵyn úı baǵdarlamasynyń aıasynda salynǵan alǵashqy nysan. Osyǵan deıin óndiristik qala Ekibastuzda áleýmettik turǵyn úı turǵyzylmaǵan bolatyn. Búgin jańa baspanaǵa qol jetkizgen turǵyndar - quqyqqorǵaý organdarynyń qyzmetkerleri, dárigerler, muǵalimder, kásiporyn jumysshylary. Olar páterlerdi 1 sharshy metri 90 000 teńge bolatyn baǵamen satyp aldy. Orta eseppen bir bólmeli páterdiń baǵasy 4 mln teńgeni quraıdy.
Orta eseppen alǵanda bir bólmeli páter úshin TÚQJB nesıesi boıynsha aı saıynǵy tólem 28 000 teńgeni quraıdy. Oljas Júzjasarovtyń da tóleıtin somasy dál osyndaı. Quqyqqorǵaý organynyń qyzmetkeri 7 jyl boıy páter jaldap kelipti. Úsh jyl buryn ol Turǵyn úı qurylys jınaq bankinen shot ashyp, baspanaly bolamyn dep aqsha jınaı bastaǵan eken. Osy ýaqyt ishinde Oljas bolashaq páter baǵasynyń 40 paıyzyn depozıtine salyp úlgeripti.
«Nesıe boıynsha tóleıtin somam osyǵan deıingi aı saıyn bireýdiń úı úshin berip kelgen aqshamnan az. Osy jyly úılendim, ulym Asan dúnıege keldi. Búgingi otbasymmen birge páter kiltin alyp otyrmyn. Eńbegim dalaǵa ketken joq», - dep áserimen bólisti bank salymshysy Oljas Júzjasarov.
Qazir 150 000 adam ómir súretin Ekibastuzdyń ár 15-turǵyny Turǵyn úı qurylys jınaq bankinen shot ashyp, qarajat jınap jatyr. Kelesi jyly memlekettik baǵdarlama aıasynda bul qalada taǵy 3 úı turǵyzylatyn bolady.