Ekibastuzdyq azamat on kúnnen beri izdestirilip jatyr

Ekibastuzda 34 jastaǵy Denıs Pokotılenkony izdeý jalǵasýda. Er adam 13 qazanda balasyn balabaqshaǵa aparǵan soń joǵalyp ketken, dep habarlaıdy QazAqparat Pavlodarnews.kz-ke silteme jasap.

Eriktiler, týystary men jaqyndary onyń tiri ekenine úmittenedi.

VITA izdeý tobynyń málimetinshe, jaqynda beınebaqylaý kameralarynan er adamnyń joǵalǵan kúni úıine qaıta barǵany belgili bolǵan.

«Biz onyń úıine oralǵanyn kameramen anyqtadyq. Sodan keıin onyń qaı ýaqytta shyqqany anyq emes. Ári qaraı qaıda ketkenin kamera arqyly qarap jatyrmyz. Ázirge anyqtaý múmkin bolmaı jatyr», - dedi top jetekshisi Ekaterına Kýdrıavtseva.

Ekibastuzdyq eriktilerdiń aıtýynsha, er adamdy qaıdan izdeý kerek ekenin kórsetetin izder joq. Eriktiler tipti Baıanaýylǵa da barǵan.

«Ony barlyq jerden izdedik. Kólikjaılar men saıajaılardy qaradyq. Er adam júrgen jolmen kınologpen birge júrip shyqtyq. Ókinishke qaraı, bul nátıje bermedi», - deıdi izdeý jumystarynyń úılestirýshisi Samal Dúısenbaeva.

Qazirgi ýaqytta birneshe topqa bólingen eriktiler, týystary, dostary, áriptesteri jáne polıtseıler er adamdy izdeýde.

Eske salaıyq, Denıs Pokotılenkonyń boıy 180-185 sm, kózi qońyr, dene bitimi ortasha, shashy qara. Er adamnyń sol qolynda qara keme túrindegi tatýırovkasy bar, al oń qasynda kishkentaı tyrtyq bar.