Ekibastuzdyq ardager Prezıdentten jylýǵa qatysty máseleni jeke baqylaýyna alýdy surady

EKІBASTUZ. QazAqparat – Ekibastuz qalalyq Ardagerler keńesiniń tóraǵasy Samat Ramazanov Prezıdentten jylý júıesindegi jóndeý jumystaryn jeke baqylaýyna alýdy jáne qalalyq «Shahter» saıabaǵyn jóndeýdi surady, dep habarlaıdy QazAqparat Aqordaǵa silteme jasap.

Memleket basshysy Qasym-Jomart Toqaev qalany abattandyrý máselesi sheshiletinin aıtty.

«Oryndy saýal. Jalpy, Ekibastuz – óte keremet qala. Men ózim bul qalany jaqsy kóremin. Bul qalany abattandyrýdy qamtamasyz etý kerek. Mindetti túrde. Sondyqtan mundaı tapsyrmany ákimshilikke berip jatyrmyn. Bul jumys oryndalady. Bul másele boıynsha eshqandaı kúmán joq. Tek qana saıabaq emes, basqa máseleler de bar. Bul túıtkilderdiń bárin mindetti túrde sheshý kerek. Ákim jańadan taǵaıyndaldy. Sondyqtan jumys óte kóp», – dedi Qasym-Jomart Toqaev qala turǵyndarymen kezdesý kezinde.

Eske salaıyq, Prezıdent Q.Toqaev jumys saparymen Pavlodar oblysynda júr.

Memleket basshysy Ekibastuzdaǵy jylý elektr ortalyǵynda júrgizilip jatqan jóndeý jumystarymen tanysty.

Premer-Mınıstrdiń birinshi orynbasary Roman Sklıar Ekibastuz qalasyndaǵy jylýmen qamtý júıesin jańǵyrtýǵa Úkimet tarapynan kórsetilgen qoldaý sharalary týraly baıandady.

Q.Toqaev JEO jaǵdaıymen tanysqan soń jergilikti turǵyndarmen áńgimelesti.

Kópbalaly ana Aıana Smaǵulova qalada balalardyń bos ýaqytyn tıimdi ótkizip, olardyń jan-jaqty damýyna arnalǵan Shyǵarmashylyq úıin salyp berýdi surady.