Ekibastuzdaǵy apat: Ajar Ǵınııat aýrýhanalarǵa qatysty túsinik berdi

ASTANA. QazAqparat - Densaýlyq saqtaý mınıstri Ajar Ǵınııat Ekibastuz aýrýhanalaryndaǵy naýqastarǵa qatysty túsinik berdi, dep habarlaıdy QazAqparat tilshisi.

Búgin Senatta ótken Úkimet saǵatynda tilshiler mınıstrden Ekibastuzdaǵy aýrýhanalardan naýqastardy basqa jerge kóshirý máselesi jaıynda surady.

«Ekibastuz qalasynyń medıtsınalyq uıymdaryna toqtalsaq, apat bolǵan alǵashqy kúnnen bastap baqylaýǵa alyndy. Eki-úsh saǵat saıyn Densaýlyq saqtaý mınıstrligine aqparat túsip turady. Búgin aýrýhana palatalarynda aýa temperatýrasy 21-22 gradýs bolsa, keıbirinde 24-ke jetti», - dedi A. Ǵınııat.

Ol apat bolǵan alǵashqy kúnnen bastap aýyr naýqastar, júkti áıelder shuǵyl túrde Pavlodarǵa jetkizilgenin atap ótti.

«Al tıisti jaǵdaı jasalǵan aýrýhanalarda naýqastar emdelip jatyr. Dári-dármek jetkilikti. Mınıstrlik ondaǵy densaýlyq saqtaý nysandaryna qatysty jaǵdaıdy qadaǵalap otyr. Sonymen qatar beınebaqylaý júıesi arqyly da kómek kórsetiledi. Bosanatyn áıelder birden Pavlodarǵa jiberiledi», - dedi mınıstr.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqýǵa kóshirildi.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.