Ekibastuzda jylý jelisin qalpyna keltirý jumysy qalaı júrip jatyr

EKІBASTUZ. QazAqparat - Pavlodar oblysynyń ákimi Asaıyn Baıhanov jumys saparymen Ekibastuzǵa bardy, dep habarlaıdy QazAqparat.

Óńir basshysy TJ kezinde zardap shekken jylý jelileri men páterlerdi jóndeý jumysynyń barysyn tekserip, jedel shtab otyrysyn ótkizdi.

Asaıyn Baıhanov qajetti jylý parametrleri saqtalmaǵan Kósherbaev pen Berkimbaev kóshelerindegi jylý jelilerin jóndeý-qalpyna keltirý jumystaryn júrgizilip jatqan turǵyn úılerdi aralady.

Ekibastuz qalasynyń ákimi Aıan Beısekın jańa jelini №7 jylý magıstraline qosý josparlanǵanyn, bul kópqabatty turǵyn úılerge jylý berýdi arttyrýǵa múmkindik beretinin atap ótti.

- Bul jumystardy qatań baqylaýǵa alyp, «Ekibastuz jylý energııasy» AQ jumysyn kúsheıtý qajet. Búginnen qalmaı jumysshylardyń jańa tobyn quryp, ddánekerleý jumystaryn bastasyn, - dep tapsyrdy Asaıyn Baıhanov. – Alda jańajyldyq merekeler kele jatqandyqtan bárin istep úlgerý kerek.

Sondaı-aq, óńir basshysy Máshhúr Júsip kóshesi, 55-úı meken-jaıyndaǵy jóndeý jumystary júrgizilip jatqan páterlerdi aralady.

Páterlerdiń biriniń ıesi ıÝlııa Zleı 27 qarashadan beri jylýsyz qalyp, 1 jeltoqsanda jylý radıatorlary jarylyp, sý astynda qalǵanyn aıtty.

Bul úıde elordalyq merdiger uıym jumys isteıdi. Páterde tusqaǵazdar jelimdelip, sozylmaly tóbeler ornatylyp, edendegi lınoleým aýystyryldy.

Páterlerdi qalpyna keltirý jumysy jalǵasyp jatyr. 20 páterde jóndeý jumystary aıaqtalsa, kezekte turǵan 32 páterdegi jumystardy 10-12 kún ishinde aıaqtaý josparlanýda.

- Turǵyndardyń shaǵymdary bolmas úshin jóndeý jumystaryn sapaly ári jyldam júrgizý kerek, - dedi Asaıyn Baıhanov.

Qalany aralap shyqqannan keıin óńir basshysy aǵymdaǵy jylytý jaǵdaıy boıynsha jedel shtab otyrysyn ótkizdi.

Ekibastuz qalasynyń ákimi Aıan Beısekınniń aıtýynsha, jylýmen jabdyqtaý júıesin retteý, zaqymdanýlar men aqaýlardy joıý jumystary jalǵasyp jatyr.

Jóndelýi tıis 110-ǵa jýyq zaqymdanýlar bar, olardy joıýmen 86 adam aınalysyp jatyr.

- Osy ýaqytqa deıin júıeni teńgerimdeý durys jolǵa qoıylmaǵan, bir aı boıy jylý berýdiń naqty parametrlerine jete almaı otyrmyz. Ekibastuz JEO-da turaqty jumys júrgizilmeıdi, - dedi Asaıyn Baıhanov. - Biz mereke kúnderi adamdardyń jylýsyz qalýyna jol bere almaımyz. 4 kóppáterli turǵyn úı men 45 jeke menshik úılerdegi parametrlerdi qalpyna keltirý jumystaryn tezirek aıaqtaý qajet. Qaladaǵy jylý jaǵdaıy qalypqa kelgenshe TÚKSh basqarmasynyń basshysyna Ekibastuzda qalýdy tapsyramyn.

Sonymen qatar, óńir basshysy qala turǵyndarymen aqparat usyný jumysynyń álsizdigin atap ótip, qala bıligi men kommýnaldyq qyzmetter halyqtyń kez kelgen shaǵymyna dereý áreket etip, jedel baılanys ornatýdy, kemshilikterdi túsindirip, olardy túzetýge shaqyrdy.

- Ekibastuzda áleýmettik jelilerdegi chattar bar. Men sizdiń jaýaptaryńyzdy kórip otyramyn, barlyq ótinimder tez qabyldanyp, pysyqtalýy kerek. Ákimdik shaǵymdar boıynsha naqty jumys isteýi tıis, - dep atap ótti Asaın Baıhanov.

Keńes barysynda oblys ákimi Ekibastuz JEO-da apatty jaǵdaıǵa jol bergeni úshin osy máselege jaýapty oblystyq energetıka jáne TKSh basqarmasynyń basshysy Erjan Salhanov tártiptik jaýapkershilikke tartylǵanyn málimdedi.

- Basqa adamdarǵa qatysty tıisti kadrlyq sheshimderdi jaqyn arada qabyldaımyn, - dedi Asaıyn Baıhanov.

Aıta keteıik, Ekibastuz JEO-daǵy apat boıynsha tergeýmen arnaıy komıssııa aınalysýda, onyń nátıjeleri saraptama jumystary aıaqtalǵannan keıin aıtylady.