Ekibastuzda sý qubyryndaǵy apat saldaryn joıýǵa TJD qyzmetkerleri jumyldyryldy

EKІBASTUZ. QazAqparat – Pavlodar oblysy TJD qyzmetkerleri Ekibastuzdaǵy apat saldaryn joıýǵa jumyldyryldy, dep habarlaıdy QazAqparat Tótenshe jaǵdaılar mınıstrligine silteme jasap.

«2023 jylǵy 3 qańtarda saǵat 6:00-den bastap Ekibastuz garnızonynyń qutqarýshylary kúshimen zaqymdalǵan ýchaskeden sýdy soryp shyǵarý jumystary júrgizilip jatyr. Saǵat 11:00-de «Qalalyq sý arnasy» MKK jáne «Injenerlik jeliler» JShS qyzmetkerleri zaqymdalǵan ýchaskeni aýystyrý jáne dıametri 500 mm tehnıkalyq sý qubyryn ajyratý boıynsha jóndeý jumystaryn bastady. Qalada jylý jáne sýmen jabdyqtaý shtattyq rejımde júrip jatyr (5 qazandyq agregaty jumys istep tur jáne 5-eýi rezervte). Avarııa ornyna TJD, «Qalalyq sý arnasy» MKK 58 adam jáne 16 tehnıkasy men quraldary jumyldyryldy. Saǵat 16:00-degi jaǵdaı boıynsha jylý jelisin qorektendirý rezervýarlaryndaǵy sý deńgeıi – 7,5 metr, synı kórsetkish – 1,6 metr. JEO rezervýarlaryn qýattandyrý – saǵatyna 900 tonna (jylý jelilerin qýattandyrý – saǵatyna 600 tonna). Qazirgi ýaqytta qorektendirý dıametri 150 mm (saǵatyna 150 tonna) aýyz sý qubyrynan júrgizilip tur», - delingen vedomstvo aqparatynda.

Pavlodar oblysy TJD baspasóz qyzmetinen málim etkendeı, vahtalyq jáne komandalyq-shtabtyq mashına (KÝNG) bazasynda jylytý pýnkti ashyldy, sondaı-aq «Vita» volonterleri ystyq tamaqpen qamtýdy uıymdastyrdy.

Eske sala keteıik, 31 jeltoqsan kúni Ekibastuz qalasynda «Qalalyq sý arnasy» kásipornyndaǵy jóndeý jumystary kezinde JEO-ǵa arnalǵan dıametri 500 mm bolatyn tehnıkalyq qubyr jaryldy.