Ekibastuzda «Prezıdent Nazarbaev» qyzǵaldaq túri ósirilmek

PAVLODAR. QazAqparat - QR Prezıdentiniń Pavlodar turǵyndarymen kezdesýinde Ekibastuzdaǵy jylyjaı gúl kesheniniń qyzmetkeri Lıýdmıla Zeevald Nursultan Nazarbaevtyń qurmetine atalǵan gollandııalyq qyzǵaldaqtardy ósirý josparlarymen bólisti.

«Gollandııada Sizdiń qurmetińizge atalǵan qyzǵaldaqtyń jańa túri shyǵaryldy. Qyzǵaldaqtyń atalmysh túrin bizdiń kásiporynda da ósirý josparlanýda. Biz ol gúlder Pavlodarda ǵana emes, bútin Qazaqstanda suranysqa ıe bolatynyna senimdimiz. Jáne Ekibastuz kenshiler men energetıkter qalasy retinde ǵana emes, eldiń gúl ortalyǵy retinde de tanymal bolady», - dedi L.Zeevald.

Óziniń esimimen atalǵan gúl týraly jańalyqty QR Prezıdenti qaljyńmen qabyldady: «Men jaıqalǵan gúlge uqsamaımyn. Gollandııaǵa barǵan saparymda maǵan ol gúldi kórsetti», - dep kúldi Elbasy.

«Ekibastuz gúl ósirýde Nıderlandyny shań qaptyryp ketedi. Kórmede ekibastuzdyq raýshan gúlderdi kórdim - olar tamasha», - dep atap ótti Prezıdent.

Lıýdmıla Zeevald sondaı-aq, Nursultan Nazarbaevqa óner salasyna kórsetip otyrǵan qamqorlyǵyna alǵysyn bildirdi. Qazaqstanda eń aýyr kezeńderdiń ózinde barlyq teatrlar jumystaryn toqtatqan joq.

«Biz Astanada sońǵy júz jyldaǵy eń ásem opera jáne balet teatryn saldyq. Horeografııalyq akademııa Astana men Almatydaǵy opera jáne balet teatrlary úshin kadrlardy daıyndaıtyn bolady. Jáne adamdardyń bul tamasha ónerge balalaryn jaqyndatýǵa tyrysýy - óte qýantarlyq. Tanymal ártis bolyp ketý mindetti emes, oǵan balany aralastyrý kerek, olar bolsa bul ádemilikti jan dúnıelerinde alyp júredi», - dedi Nazarbaev.