Ekibastuzda keı avtobýstar jolaýshy tasymaldaýǵa shyqpaı qoıdy

Ekibastuzda keıbir jolaýshy tasymaldaıtyn avtobýstar jelige shyqpaı qoıdy. Bul olardyń konkýrs qorytyndysyna bildirgen narazylyǵy boldy. Ákimdik qala turǵyndarynan keshirim surady, dep habarlaıdy QazAqparat.

Qyrkúıektiń 14-i kúni 2, 22 jáne 5 nómirli úsh baǵyttaǵy avtobýstar jelide jumys istemedi.

Sonyń saldarynan keıbir azamattar jumysqa, oqýshylar sabaqqa keshigip kelgen.

Jurt taksı shaqyryp, aıaldamalarda tońyp qalǵanyna narazy. Olar narazylyǵyn áleýmettik jelilerde bildirdi.

«Balalar aıaldamalarda tońyp, kútip turdy. Biz sabaqqa keshigip qaldyq. Mundaı jańalyqty aldyn ala habarlaý kerek», – dedi narazy qala turǵyndarynyń biri.

Ekibastuz ákimdigi bul jaǵdaıǵa baılanysty jaýap qatyp, qoǵamdyq kólikterdegi bógelisterge túsinik berdi.

«Buǵan deıin № 2, 22, 5 baǵyttar boıynsha tasymaldaıtyn kompanııany anyqtaý úshin konkýrs ótkizilip, baıqaý qorytyndysy boıynsha «Jolaman» JShS jeńimpaz atandy. Buryn tasymaldaýdy «Tulpar» JShS júzege asyratyn. Kelisim boıynsha «Tulpar» JShS 18 qyrkúıekke deıin qyzmet kórsetýi tıis edi. Konkýrs nátıjesimen kelispegendikten kompanııa jelige shyqpady. Qalyptasqan jaǵdaı úshin keshirim suraımyz jáne «Jolaman» JShS jyljymaly quramy daıyndalyp jatqanyn habarlaımyz, №2, 22, 5-marshrýttar jaqyn arada jelige qaıtarylyp, ádettegi keste boıynsha jumysyn jalǵastyrady», - dep habarlady qalalyq ákimdik Instagram jelisindegi paraqshasynda.

Ekibastuzda kún saıyn barlyǵy segiz baǵyt boıynsha 30-dan astam avtobýs jelige shyǵady.

Buǵan deıin olarǵa eki tasymaldaýshy – «Jolaman-EK» JShS jáne «Tulpar-EK» JShS qyzmet kórsetken.

Sońǵysy úsh avtobýs baǵytyna jaýapty boldy, endi ol baıqaý qorytyndysy boıynsha qyzmet kórsetý quqyǵynan aıryldy.