Ekibastuzda áli 11 kópqabatty úı jylýsyz qalyp otyr - ákimdik

ASTANA. QazAqparat – Pavlodar oblysy Ekibastuz qalasynyń ákimi Aıan Beısekın qalada áli 11 kópqabatty úıdiń jylýsyz turǵanyn málim etti, habarlaıdy QazAqparat tilshisi.

Búgingi tańda bizde 11 turǵyn úı jylýsyz kúıde tur. Bul – 11 úıdiń páterlerine jylý berilmegen degen sóz. Biraq, bul jerde nazar aýdaratyn másele bar. Osy 11 kópqabatty úıdiń jertólesine jylý jetkizildi. Qazir tsırkýlıatsııa bar. Endigi aldymyzda turǵan mindet – páterler arasynda jylý tasymaldaıtyn magıstral qubyr men ár páterdiń regıstrine jylý jetkizý. Qazir bizdiń brıgadalar osymen aınalysyp jatyr, -

dedi qala ákimi óńirlik kommýnıkatsııalar qyzmetinde ótken brıfıngide.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqýǵa kóshirildi.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.

Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.

Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklıar qalalyq jylý jelilerindegi apattyń saldaryn joıý jónindegi jumystar aıaqtalǵansha Ekibastuzda bolatyny habarlandy.

Búgin Roman Sklıar telefon arqyly Úkimet basshysy Álıhan Smaıylovqa qalalyq jylý jelilerindegi apattyń zardaptaryn joıý barysy týraly baıandady.