Ekibastuzda 144 otbasy páter kiltin aldy

PAVLODAR. QazAqparat -Pavlodar oblysynyń ákimi Ábilqaıyr Sqaqov Ekibastuz turǵyndaryna páter kiltin tabystady, dep habarlaıdy QazAqparat Pavlodarnews.kz-ke silteme jasap.

Óńir basshysynyń baspasóz qyzmetiniń málimdeýinshe, qonystanýshylar jańa úıdiń aldynda Ábilqaıyr Sqaqovpen birge shyrsha otyrǵyzdy. Ekibastuzdyqtar bul aǵashtar 8-10 jyldan keıin aýlanyń sánin kirgizetine senimdi.

- «Nurly jer» baǵdarlamasy aıasynda 144 otbasy páter alǵandyǵyna qýanyshtymyn. Bıyl Ekibastuzda aýdany 56 myń sharshy metrge jýyq turǵyn úı paıdalanýǵa beriledi, bul – 1000-nan astam páter. Qalada mundaı kólemde turǵyn úı qurylysyn bolmaǵaly biraz ýaqyt ótti. Ár otbasyna baqyt pen amandyq tileımin. Sizderdi jańa qonystaryńyzben quttyqtaımyn! - dep atap ótti Pavlodar oblysynyń ákimi.

Alǵash bolyp páter alǵandar qatarynda Gúlmıra Asqarova da bar. Kóp balaly, ári jalǵyz ilikti ana bul sátti segiz jyl kútkenin jetkizdi.

- Meniń birinshi balam múgedek, joldasym joq, páter kezeginde turǵanyma segiz jyl boldy. Búgin meniń tóbem kókke jetti. Osyndaı keremet úı salyp bergen memleket pen qurylysshylarǵa alǵysym sheksiz, - deıdi ol.

Jańa toǵyz qabatty úı paıdalanýǵa berilgen shaǵyn aýdanda taǵy tórt úıdiń qurylysy aıaqtalýǵa jaqyn. Jospar boıynsha jyl sońyna deıin bul aýlada 432 otbasy turatyn bolady.