Ekibastuz jylý jelilerindegi osal ýchaskelerde 109 aqaý anyqtalǵan
JEO-daǵy jóndeý jumystaryna 270-ten astam adam jumyldyrylǵan. Bekitilgen kesteden artta qalýshylyq joq jáne qajetti jabdyqtar ýaqytynda jetkizilgen. Bes qazandyq agregattarynda bólshekteý jumystary, gaz qubyrlaryn, aýa ótkizgishterdi, ekrandyq qubyrlardy aýystyrý, qazandyqtardyń qaptamalaryn aýystyrý jáne t.b. atqarylyp jatyr. Tamyz aıynyń sońyna deıin 4 jylý magıstralin qaıta jańartýdy aıaqtaý josparlanǵan.
Ekibastuz ákiminiń aqparaty boıynsha, jylý qabyldaýǵa daıyndyq aktisi 624 kópqabatty turǵyn úıden (690 úıden) alynǵan. Jylý toraptary men ishki júıelerdi jýý jáne nyǵyzdaý tolyq oryndalǵan. 204 turǵyn úıde júıeni baptaý jumystary oryndaldy, drossel qurylǵylary ornatyldy jáne shaıbalaý júrgizildi.
Óńir basshysy jylý berý maýsymynyń sátti ótýi tek jergilikti atqarýshy organnyń ǵana emes, sondaı-aq turǵyndardyń da birlesken jumysy men jaýapkershiligi ekenin atap ótti. Osy másele boıynsha túsindirý jumystaryn Ekibastuz qalasy ákimdiginiń turǵyn úı ınspektsııasynyń mamandary turaqty negizde júrgizip keledi. Turǵyndardyń maqsatty qarajaty esebinen 131 úıdiń jylýmen, sýmen jabdyqtaý jáne káriz júıeleri jóndeldi.
Oblys ákimi tamyz aıynyń sońyna deıin gıdravlıkalyq synaqtardyń qorytyndysy boıynsha anyqtalǵan aqaýlardy joıýdy tapsyrdy. Jelilerdiń eń osal ýchaskelerinde barlyǵy 109 aqaý anyqtalyp, 24-i joıylǵan.
Eske salaıyq, ótken jylǵy 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy. 28 qarasha kúni tańerteń qalada jergilikti aýqymdaǵy tótenshe jaǵdaı jarııalandy. 30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.