Ekibastuz JEO-syna 5,5 mln teńge aıyppul salyndy

ASTANA. QazAqparat – Pavlodar oblystyq prokýratýrasynyń tapsyrmasy boıynsha sanıtarııalyq-epıdemıologııalyq baqylaý departamenti «Ekibastuzjylýenergo» JShS-niń birneshe tsehyna jospardan tys tekserý júrgizdi, dep habarlaıdy QazAqparat tilshisi.

Departamenttiń baspasóz qyzmeti usynǵan aqparatqa saı, tekseris barysynda Ekibastuz jylý elektr ortalyǵynda sanıtarlyq talapqa sáıkes kelmeıtin faktiler anyqtalǵan. Atap aıtqanda, qazandyq-týrbınalyq tsehynyń aýmaǵynda kóp kólemde shańnyń bolýy, úılerdegi temperatýranyń parametrlerge sáıkes kelmeýi sııaqty kemshilikteri belgili bolǵan. Sonymen qatar, tsehtar tıisti kólemde jaryqpen qamtamasyz etilmegen. Oǵan qosa aýyz sý sapasy gıgıenalyq normaǵa saı bolmaı shyqqan.

«Ekibastuzjylýenergo» JShS-ne qatysty ákimshilik quqyq buzýshylyq týraly is alǵashqy kezeńde Ekibastuz qalasynyń sotynda qaraldy. Onda sot Ákimshilik quqyq buzýshylyq týraly kodekstiń 425-baby 1-bóligine saı, «Ekibastuzjylýenergo» seriktestigine jalpy somasy 1600 AEK (5 520 000 teńge) aıyppul salý týraly qaýly shyǵardy», - delingen oblystyq sanıtarlyq-epıdemıologııalyq baqylaý departamentiniń habarlamasynda.

Kásiporyn sottyń bul sheshimmen kelispese, onda odan joǵary sot organyna shaǵymdanýǵa quqyly.

Qosa ketsek, buǵan deıin de Ekibastuz jylý elektr ortalyǵyna 2,7 mln teńge aıyppul salynǵan.

Eske salaıyq, byltyr 27 qarashada Ekibastuz JEO-syndaǵy tórt birdeı qazandyq isten shyǵyp, qala jylýsyz qalǵan edi.