Eki jyldan keıin 100 jyldyq mereıtoıyńyzǵa kelemin - Almaty ákimi ardagerge
«Sizge kórsetken erligińiz úshin bas ıip, taǵzym etemiz. Sizder bizge beıbit aspan syıladyńyzdar. Eger sizdiń urys dalasyndaǵy erlikterińiz bolmasa, qazir ne bolatynyn elestetý qıyn. Sizge uzaq ómir tileımin! Men sizdiń 100 jyldyq mereıtoıyńyzǵa eki jyldan keıin mindetti túrde kelemin», – dedi Erbolat Dosaev ardager Shangereı Janybekovke.
Shangereı Janybekov – Qostanaı oblysynyń týmasy. Soǵysqa deıin medıtsınalyq ýchılışede oqyǵan. 1942 jyly maıdanǵa 18 jastaǵy áskerı feldsher bolyp shaqyrylǵan. 2-shi Ýkraın jáne Brıansk maıdandarynda boldy. Poltava, Kırovograd, Kremenchýk, Harkov, Belgorod, Ýkraına, Moldova, Avstrııa, Vengrııa, Rýmynııa jáne Chehoslovakııany jaýlardan tazartýǵa qatysty. Jeńis kúnin Avstrııada qarsy aldy. Oktıabr revolıýtsııasy, II dárejeli Otan soǵysy, Eńbek Qyzyl Tý ordenderimen, «Erligi úshin» eki medalmen, Qazaq KSR Joǵarǵy Keńesiniń Qurmet gramotalarymen jáne basqa da laıyqty nagradalarmen marapattalǵan. 2017 jyly Almaty qalasynyń Qurmetti azamaty ataǵy berildi.
Sondaı-aq, Erbolat Dosaev Qaıyrly Jonqabaevpen kezdesti. Ol 1941 jyldyń qazan aıynda áskerge shaqyrylyp, Máskeý túbindegi aty ańyzǵa aınalǵan 8-shi gvardııalyq Panfılov dıvızııasynyń quramynda soǵystyń sońyna deıin boldy.
Qaıyrly Jonqabaev jeńisti Kenıgsberg qalasynyń shetinde qarsy aldy jáne soǵystan keıin Kalınıno qalasynyń komendatýrasynda qyzmet etti.
«Ókinishke oraı, ardagerlerdiń ishinde búgingi beıbit kúnge jetken jalǵyz panfılovshy ózińizsiz. Sizde kóptegen marapattar bar – Qyzyl Juldyz ordeni, ІІ dárejeli Otan soǵysy, Halyqtar Dostyǵy ordeni, «Erligi úshin» medali jáne basqasy. Biraq, bizdiń tynysh balalyq shaǵymyz, balalarymyzdyń beıbit jáne baqytty ómiri úshin biz Sizge máńgi qaryzdarmyz», – dedi Erbolat Dosaev.
Áńgime barysynda Almaty basshysy qalada barlyǵy 75 ardager qalǵanyn jáne olardyń barlyǵyna laıyqty kóńil bólinip, qoldaýǵa ıe bolǵanyn atap ótti.
«Orynbasarlarym, aýdan ákimderi, basqarma basshylary – bárimiz ardagerlerdi aralap, árqaısysyn kele jatqan 9 mamyr merekesimen quttyqtaımyz. Aldyńǵy eki jylda koronavırýs jaǵdaıynda sanıtarlyq-epıdemıologııalyq shekteýlerge baılanysty aralaýǵa jáne merekelik is-sharalar ótkizýge múmkindik bolmady. Bıyl bári oıdaǵydaı bolady. Kontsert ótedi, qurmet kórsetiledi. Sizderdi 9 mamyrda gúl shoqtaryn qoıýǵa shaqyramyn. Biz kólikpen, basqa da barlyq qajettiliktermen tolyq qamtamasyz etemiz», – dedi Erbolat Dosaev ardagermen áńgimelesý barysynda.
Qala basshysy 1943 jyldan bastap armııa qatarynda qyzmet etken taǵy bir ardager – Aleksandr Jýravlevti quttyqtady. Ol Karel maıdanynda soǵysyp, 1944 jyldyń shildesinen bastap 1-shi Ýkraın maıdanyna ótti, sodan keıin Polshada, Germanııada jáne Pragada jaýmen shaıqasty. Jeńisti 1945 jyly 9 mamyrda Pragada qarsy aldy. Gvardııalyq artıllerııalyq brıgadada kapıtan ataǵynda barlaýshy bolyp qyzmet etti, brıgada starshınasy boldy. Soǵystan soń 1950 jyldyń mamyryna deıin áskerde qyzmetin jalǵastyrdy.
Áskerı erligi úshin Aleksandr Jýravlev І dárejeli Otan soǵysy ordenin, «Germanııany jeńgeni úshin», «Varshava úshin», «Berlın úshin» jáne basqa medaldardy ıelendi.
«Sizderdi shyn júrekten merekemen quttyqtaımyn. Alǵysym zor. Men árqashan balalaryma qazirgi bar jaqsylyqtyń bári jaı ǵana paıda bolmaǵanyn aıtamyn. Bári basqasha bolýy múmkin edi. Bizdiń beıbit aspan úshin mıllıondaǵan adam qaıtys boldy. Árıne, bul taqyryp tarıhqa birtindep enip keledi. Jas býyn qashanda osylaı bolǵan dep oılaıdy. Sizderdiń janqııarlyq erlikterińiz eshqashan umytylmaıdy, júregimizde saqtalady. Sizderdi 9 mamyrda merekede kútemiz, birge atap ótemiz», – dedi ákim Jýravlevter úıindegi jyly qabyldaý kezinde.
Kezdesý barysynda soǵysqa qatysýshylar estelikterimen, ázil áńgimelerimen bólisip, elimizge beıbitshilik pen kelisim tiledi.
Buǵan deıin Almatyda ardagerlerge beriletin birjolǵy járdemaqy eki ese ulǵaıǵany habarlanǵan.