Eki jyl onlaın oqýdyń zardaby ondaǵan jyldarǵa sozylady – mınıstr

NUR-SULTAN. QazAqparat – Bilim salasynyń sarapshylarymen kezdesken Ǵylym jáne joǵary bilim mınıstri Saıasat Nurbek onlaın oqytýyń zardaptary týraly baıandady, dep habarlaıdy QazAqparat tilshisi.

«Sońǵy 2 jylda biz eń qundy dúnıemizdi joǵalttyq. Dálirek aıtsaq, pandemııa saldarynan bilim sapasy quldyrady. Osy ýaqyt aralyǵynda bolǵan onlaın oqýdyń zardaby ondaǵan jyldarǵa sozylýy múmkin. Bul óz kezeginde qylmystardyń kóbeıýine, saýattylyq jáne tabys deńgeıiniń tómendeýine ákelip soǵady. Sonymen qatar joǵary oqý oryndarynda oqıtyn stýdentter qatary qysqardy», - dedi mınıstr.

Qosa ketsek, bul ýaqytqa deıin Ǵylym jáne joǵary bilim mınıstri Saıasat Nurbek elimizde ǵylymı qyzmetkerler tapshy ekenin málimdegen bolatyn.