Eki jyl boıy Qazaqstanda elektr energııasynyń tapshylyǵy baıqalýda – Álıhan Smaıylov

ASTANA. QazAqparat – QR Premer-Mınıstri Álıhan Smaıylov jańa tarıftik saıasattyń qajettiligin túsindirdi, dep habarlaıdy QazAqparat tilshisi.

«Stantsııalar, kommýnaldyq kásiporyndar is júzinde 3 jyldan astam ýaqyt boıy tabyssyz jumys istep keldi, sondyqtan jóndeý jumystaryna qarajat salǵan joq. Qarajat salynsa da, ol qaryz alý arqyly nemese memleket esebinen júzege asyryldy. Al, energııa obektilerin jóndeý quny ondaǵan esege qymbattap ketti. Metall men qubyrlar, armatýra men elektrotehnıkalyq buıymdardyń jáne basqa da jabdyqtardyń baǵasy aıtarlyqtaı ósti», - dep atap ótti Premer-Mınıstr Úkimet otyrysynda.

Sonymen birge, jalaqynyń tómen bolýyna baılanysty energetıka salasynan bilikti mamandar jappaı kete bastady. Al kásiporyndar olarǵa tıimdi jumys jaǵdaıyn usyna almady.

«Buǵan qosa, 2021 jyldan bastap Qazaqstanda elektr energııasynyń tapshylyǵy paıda boldy. Biz elektr qýatyn ulǵaıtýǵa tıispiz. Sondyqtan, tarıfterdi ósirý – qajettilik. Al «Tarıfti ınvestıtsııaǵa aıyrbastaý» qaǵıdatyn engizsek, tarıfti ósirýden túsetin paıda bireýdiń qaltasyna ketpeı, tikeleı óndiristi jańǵyrtýǵa jumsalatynyna senimdi bolamyz. Jańa tarıftik saıasat ashyqtyq, eseptilik jáne jarııalylyq prıntsıpterine negizdeletin bolady. Tıisti zańnamalyq túzetýler, normatıvtik quqyqtyq aktiler qabyldandy», - dedi Á. Smaıylov.

Aıta keteıik, bıyl turǵyndar úshin tarıfter 10%-ten 30%-ke deıin ósedi.

Buǵan deıin Ulttyq ekonomıka mınıstri Álibek Qýantyrov «Tarıfti ınvestıtsııalarǵa aıyrbastaý» baǵdarlamasy qalaı júrgiziletinin túsindirgen edi.