Eki poıyzdyń júrý kestesine ózgeris engizildi - QTJ

NUR-SULTAN. QazAqparat - «Jolaýshylar tasymaly» AQ jolaýshylar poıyzdarynyń júrý kestesine ózgeris engiziletinin málim etti, dep habarlaıdy QazAqparat.

Atap aıtqanda, №375/376 «Nur-Sultan - Nurly jol - Rıdder» poıyzynyń kestesi ózgeredi. 22 mamyrdan bastap bul quram «Semeı - Shar - Óskemen» (buryn «Semeı - Lokot - Óskemen» arqyly qatynaıtyn) arqyly júretin bolady. Buǵan deıin habarlaǵanymyzdaı, jolaýshylardyń jol júrý ýaqyty 5 saǵatqa qysqarady. Sondaı-aq tekserýge baılanysty memlekettik shekaranyń ótkizý pýnktterinde uzaq ýaqyt aıaldamaıtyn bolady. Joldaǵy jalpy ýaqyt - 23 saǵat 23 mınýt.

Sonymen qatar 22 mamyrdan № 086 «Nur-Sultan - Saryaǵash» baǵytyndaǵy poıyzdyń kestesi ózgeredi. Endi bul quram «Nur-Sultan - Nurly jol» temirjol vokzalynan qatynaıdy.

«Jolaýshylar tasymaly» AQ-dan málim etkendeı, atalmysh ózgerister jolaýshylardan kelip túsken kóptegen ótinishterden keıin engizilip otyr. Tolyq aqparatty «105» anyqtama telefonynan alýǵa bolady.