Eki óńirde júrgizýshi kýálikteri satylyp kelgen: QR ІІM málimdeme jasady
«Eki jyldan astam ýaqyttan beri polıtsııa júrgizýshilikke úmitkerlerden teorııalyq jáne praktıkalyq emtıhandardy qabyldaýǵa qatyspaıdy. Polıtsııa qyzmetkerleri vedomstvolyq esepke alý boıynsha júrgizýshi kýáligin alýǵa úmitkerlerdi júrgizýshi kýáliginen aıyrý jáne basqa da málimet alý turǵysynan ǵana tekserýdi júzege asyrady», – dedi ІІM Ákimshilik polıtsııa komıtetinen.
Vedomstvo málimetinshe, bul júrgizýshi kýálikterin berý kezinde azamattardyń polıtsııamen baılanysyn azaıtý jáne sybaılas jemqorlyq faktilerin boldyrmaý úshin jasaldy. Nátıjesinde sońǵy úsh jylda polıtsııa qatarynda sybaılas jemqorlyq qylmystarynyń sany 43% tómendedi.
«Jol erejesin bilmeıtin júrgizýshiler azamattarǵa aıtarlyqtaı qaýip tóndiredi. Sondyqtan kólik tizginine otyrǵysy keletinder olarǵa júkteletin jaýapkershilikti sezinýi kerek. Azamattardan jolda saq bolyp, jol erejesin qatań saqtaýdy suraımyz», – dedi polıtsııada.
Eske salaıyq, keshe QR Sybaılas jemqorlyqqa qarsy is-qımyl agentigi Qostanaı jáne Aqmola oblystarynda Mamandandyrylǵan halyqqa qyzmet kórsetý ortalyqtarynda júrgizýshi kýálikteri zańsyz berilip kelgeni týraly habarlady.
«Júrgizýshi kýáliginen úmitti azamattardyń ornyna emtıhandy arnaıy daıyndalǵan tulǵalar tapsyryp otyrǵan. Mysaly, Aqmola oblysynda arnaıy daıyndalǵan adamdar emtıhan kompıýterlerine qashyqtan qol jetkizip, bógde azamttardyń ornyna durys jaýabyn belgilep otyrǵan.
Al Qostanaı oblysynda arnaıy daıyndalǵan adamdar medıtsınalyq maska men bas kıimniń kómegimen bet álpetin tumshalaý arqyly ózge azamattardyń ornyna kirip kelgen. Tergeý barysynda 1 myńnan astam júrgizýshi kýáligin zańsyz berý faktileri tekserilip, emtıhannan sátti ótkeni týraly berilgen jalǵan anyqtamalar qaıtaryldy», - delingen bolatyn agenttik málimetinde.