Eki oblysta zańsyz satylmaq bolǵan 9 myń maska men 700 antıseptık tárkilendi

NUR-SULTAN. QazAqparat - Elimizdiń eki óńirinde antıseptıkalyq zattar men medıtsınalyq maskalardy zańsyz satý faktileri anyqtaldy, dep habarlaıdy QR QM Qarjy monıtorıngi komıtetiniń baspasóz qyzmeti.

Tótenshe jaǵdaıda Qarjy monıtorıngi komıteti jedel-izdestirý is-sharalaryn júrgizý barysynda medıtsınalyq maskalar men antıseptıkalyq preparattardy satý kezinde zań buzýshylyq faktilerin anyqtady.

«Komıtettiń Túrkistan jáne Mańǵystaý oblystary boıynsha Ekonomıkalyq tergeý departamentteri júrgizgen jedel-izdestirý sharalary nátıjesinde jalpy somasy 1 452 500 teńgege 9350 dana medıtsınalyq maska, 770 000 teńge somasyna 700 antıseptık (kólemi 100 ml.) tárkilenip alyndy. Qazirgi tańda 1990 jyly týǵan Túrkistan qalasynyń turǵyny QR AQK 463-babynyń 1-bóligine sáıkes ákimshilik jaýapkershilikke tartyldy, Aqtaý qalasyndaǵy fakti boıynsha QR QK 214-baby 1-bóligine sáıkes (zańsyz kásipkerlik qyzmet) sotqa deıingi tergeý amaldary júrgizilýde» delingen habarlamada.

QR Prezıdenti janyndaǵy Tótenshe jaǵdaı rejımin qamtamasyz etý jónindegi memlekettik komıssııasy hattamasynyń 8-tarmaǵyna sáıkes tárkilengen medıtsınalyq ónimder densaýlyq saqtaý mekemelerine jaýapty saqtaýǵa tapsyryldy.