Eki oblysta aýyl sharýashylyǵyn onlaın-nesıeleý engizildi
Aıta keteıik, Ekonomıkany jańǵyrtý jónindegi memlekettik komıssııanyń sheshimimen byltyr «QazAgro» holdıngin transformatsııalaý baǵdarlamasy bekitilgen bolatyn. Ondaǵy negizgi baǵyttardyń biri – enshiles kompanııalardaǵy nesıe berý protsesin avtomattandyrý. Osyǵan oraı, Aýyl sharýashylyǵyn qarjylaı qoldaý qory «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda nesıe ótinimderin qabyldaýdy avtomattandyrý jáne nesıe ónimderin ońtaılandyrý jumystaryn júrgizýde.
«Ótinimderdi qaraý protsesiniń merzimin qysqartý, sapasyn jáne ashyqtyǵyn arttyrý maqsatynda «Mal sharýashylyǵyn damytýǵa nesıe berý» ónimi boıynsha (4 mln teńgege deıin) testtik rejımdegi ótinimderdi onlaın qabyldaý júıesi engizildi. Kásipker úıinde nemese keńsede otyryp, júıege óziniń elektrondy tsıfrlyq qoltańbasynyń (HQKO-nan nemese egov.kz arqyly alǵan) kómegimen kiredi de «Eńbek» baǵdarlamasynyń talaptaryna sáıkestigin tekserýge ótinim jibere alady. Qordyń avtomattandyrylǵan júıesi memlekettik derekqorlar men kredıttik bıýrolardyń málimetterin paıdalana otyryp, áleýetti nesıe alýshynyń senimdiligi men nesıe alý múmkindigin tekseredi. Ó tinim aldyn ala maquldanǵannan keıin kepildikke qoıatyn múliginiń qujattaryn alyp, Qorǵa barady. Eger qandaı da bir sebeptermen maquldamaý týraly sheshim shyǵarylsa (salyqqa qatysty, bankter men basqa qarjy ınstıtýttary aldyndaǵy merzimi ótken bereshek, jaǵymsyz nesıe tarıhy jáne t.b.), qujat jınap, Qorǵa barýdyń qajetti joq «, - delingen baspasóz baıanynda .
Ótinimderdi onlaın qabyldaý júıesi Aqmola jáne Almaty oblystarynyń turǵyndary úshin Nur-Sultan jáne Almaty qalalarynda ornalasqan fılıaldarda iske qosyl ǵan.
«Bıznes-protsesterdi ońtaılandyrý Qor qyzmetindegi mańyzdy baǵyttardyń biri. Júıeni avtomattandyrýǵa qatysty aýqymdy jumystar júrgizildi. Ótinimdi avtomatty túrde berý júıesi ázirlendi. Onyń kómegimen memlekettik derekter qorynyń, memlekettik kredıttik bıýronyń jáne Birinshi kredıttik bıýronyń qoljetimdi málimetterine taldaý júrgiziledi», - deıdi «Aýyl sharýashylyǵyn qarjylaı qoldaý qory» AQ Basqarýshy dırektory Marına Asanova.
Nesıeni aldyn-ala onlaın maquldaýǵa ótinish berý úshin ne isteý kerek? Eger siz Aqmola nemese Almaty oblysynyń turǵyny bolsańyz jáne mal sharýashylyǵyn damytýǵa qarjy alǵyńyz kelse, www.online.fagri.kz portalyna kirińiz jáne kelisimge qol qoıyńyz. «Jańa ótinim jasaý» batyrmasyn basyp, ótinimdi jeke kabınet arqyly jiberińiz. Júıe memlekettik derekqordan aqparat suratý arqyly azamattyń nesıe alý múmkindigi men senimdiligin tekseredi. Oń nátıje bolǵan jaǵdaıda « jalǵastyrý « batyrmasy iske qosylady.
«Kepildikti qamtamasyz etý» bóliminde kepilge qoıýdy josparlaǵan múlikke qatysty derekterdi engizińiz, júıe múliktiń naryqtyq qunyn esepteıdi. Usynylǵan kepildik múlki jetkilikti bolǵan jaǵdaıda júıe kepildikti qamtamasyz etý jónindegi qujattarmen oblystyq fılıalǵa júginý múmkindigi týraly habarlamany kórsetedi. Qujattardy nesıe menedjerine tapsyrǵannan keıin siz ózińizdiń jeke kabınetińizden ótinimińiz boıynsha júrgizilip jatqan jumystyń qaı deńgeıde ekenin baqylaı alasyz. Ýákiletti organ oń sheshim shyǵarǵan jaǵdaıda nesıe shartyn jasasý úshin Aýyl sharýashylyǵyn qarjylaı qoldaý qorynyń oblystyq fılıalyna barýyńyz kerek.
Ótinimdi qaraýdyń elektrondyq formaty «adamı faktor» men suratylatyn qujattardyń sanyn azaıtady. Sondaı-aq, basqa da qujattardy daıyndaý men qaraý kezeńderi alynyp tastaldy. Janýarlardyń túrlerine, olardyń sany men aımaǵyna baılanysty bıznes-josparlardy standarttaý jumysy júrgizildi. Klıentke bıznes-jospar jasaýdyń qajeti joq, oǵan júıeden jeke bıznes-jospar beriledi. Sonymen qatar, buryn 10-13 qujat jınaý talap etilgen bolsa, qazir tek ótinim berýshiniń jeke kýáligi, elektrondy tsıfrlyq qoltańbasy jáne kepildikke qoıatyn múliginiń qujaty ǵana qajet. Ótinimdi aldyn ala maquldaý sheshimi 1 saǵatqa deıingi aralyqta qabyldanady. Al, ótinimdi odan ári qaraý merzimi 15-ten 3 jumys kúnine deıin qasqarady. Nesıege qatysty qosymsha aqparatty www.fagri.kz saıtynan oqýǵa bolady.