Eki oblysta áskerden jaltarǵan azamattarǵa 1000 AEK kóleminde aıyppul salyndy
«Aıyppul salý degen ákimshilik kodekspen retteledi. Bergi jaǵynan alatyn bolsaq, áskerı-medıtsınalyq tekserýge kelmegeni úshin 5 AEK-ke deıin aıyppul salynady. Ondaı aıyppul kúndelikti jumysta salynyp jatqanyn aıta ketý kerek. Al endi 1000 AEK-ke deıingi aıyppul osy kúnge deıin eki oblysta salynǵan. Pavlodar oblysynda jáne Qostanaı oblysynda jaqynda sondaı aıyppul arqalaǵandar boldy. Odan basqa áskerden jaltarǵandarǵa qylmystyq jaýapqa tartý jumystary júrgizilip jatyr», - deıdi QR Qarýly Kúshteri Bas shtaby Uıymdastyrý-jumyldyrý jumystary departamentiniń bastyǵy, polkovnık Ardaq Kýkatov OKQ-da ótken baspasóz máslıhatynda.
Eske sala ketsek, Ardaq Kýkatov oǵan deıin Qazaqstanda osy jyly 35 myń jas jigit áskerge baratynyn málim etken bolatyn.
«2019 jyldyń kókteminde jyldaǵydaı QR Qarýly Kúshterine, basqa da áskerı quralymdarǵa keıinge qalýǵa jáne shaqyrylýdan bosatylýǵa quqyǵy joq 18 ben 27 jas aralyǵyndaǵy azamattardy shaqyrý josparlanyp otyr. Merzimdi áskerı qyzmet boıynsha aldymen shekara qyzmetine sarbazdar shaqyrylady. 2019 jyly jalpy 35 myńǵa tarta adamdy shaqyrý kózdelýde. Onyń 17,5 myńy osy kóktemde, taǵy 17,5 myńy kúzde ásker qataryn tolyqtyrady. Atap aıtqanda, shekara qyzmetine 7,5 myń adam, QR Qarýly kúshterine 13 myńǵa tarta adam, memlekettik kúzet qyzmetine 600 adam, ulttyq ulanǵa 13 myń adam barady», - dedi ol OKQ-da ótken baspasóz máslıhatynda.