Eki myńnan astam oqýshy robototehnıkadan irikteý chempıonattaryna qatysady

ASTANA. QazAqparat - Elimizde robototehnıkadan irikteý oıyndaryna eki myńnan astam oqýshy qatysady. Ulttyq kezeńniń jeńimpazdary Amerıkanyń Hıýston qalasynda ótetin halyqaralyq chempıonatta el namysyn qorǵaýǵa múmkindik alady, dep habarlaıdy QR Oqý-aǵartý mınıstrliginiń baspasóz qyzmeti.

Dúnıejúzilik FIRST Robotics qozǵalysy aıasynda irikteý oıyndary 21-29 qańtar aralyǵynda Astana, Almaty, Shymkent jáne Oral qalalarynda ótedi. Jarys Oqý-aǵartý mınıstrligi men USTEM Robotics qoǵamdyq qorynyń qoldaýymen ótedi.

«Bıylǵy jarys energııa taqyryby aıasynda ótip jatyr. Robottardy baǵdarlamalaý men qurastyrýdan bólek, balalar ınnovatsııalyq jobalarmen aınalysady. Óńirlik kezeńge ótý úshin árbir komanda áleýmettik jelilerde kóptegen tapsyrmalardy oryndady, sonyń ishinde balalar túrli energetıkalyq stantsııalarǵa baryp, reportaj jasap, sarapshylardan suhbat aldy. Onymen qosa, oqý oryndarynda sheberlik sabaq ótkizdi, sondaı-aq, ózderiniń jergilikti qoǵamdastyǵy ishinde mańyzdy máselelerdi kóterdi. Balalardyń eńbekterin #FIRSTKZ2023 heshtegi arqyly ınstagram jelisinen tamashalaýǵa bolady. Aqpannyń 24-26 aralyǵynda Astanada ótetin Ulttyq kezeńniń jeńimpazdary el namysyn qorǵaýǵa Hıýstonǵa, AQSh-qa barady. Aıta keteıik, jyl saıyn robototehnıkamen aınalysatyn balalardyń sany artyp keledi. Buǵan sebep Oqý-aǵartý mınıstrliginiń qoldaýy. Osy baǵyttaǵy úılesimdi eńbektiń nátıjesinde 2022 jyldyń qazan aıynda bizdiń oqýshylar Jenevada ótken FIRST Global Challenge Dúnıejúzilik jarysynda jeńiske jetti. Keıin Shymkent qalasynyń oqýshylary Dortmýnd qalasynda ótken robototehnıka boıynsha Halyqaralyq Olımpıadada alǵash ret ekinshi oryn ıelendi», - dedi USTEM Robotics qorynyń jetekshisi Asylbek Mýrzahmetov.

Esterińizge sala keteıik, sońǵy 3 jylda Qazaqstanda 3 myńnan astam robototehnıka kabıneti ashyldy. Eki myńnan astam muǵalim robototehnıka kýrstarynan ótti.

Jarys kestesin myna jerden kórýge bolady.

Foto: gov.kz