Eki myńǵa jýyq qylmys izin sýytpaı táýlik ishinde ashyldy – ІІM

ASTANA. QazAqparat – Ótken aptada Qazaqstan aýmaǵynda úsh myńǵa jýyq qylmys jasaldy, dep habarlaıdy QazAqparat tilshisi.

Bul týraly Іshki ister mınıstrliginiń onlaın-brıfıngisinde vedomstvo ókili Shuǵyla Turlybek málim etti.

«Aldymen eldegi krımınogendik jaǵdaıǵa toqtalaıyq. Bir apta ishinde 2832 qylmys jasaldy, onyń 1795-i táýlik ishinde ashyldy. Polıtsııa qyzmetkerleri «izin sýytpaı» 7 kisi óltirýdi, 5 ólimge ákep soqqan densaýlyqqa qasaqana aýyr zııan keltirýdi, 49 tonaý jáne 413 bóten múlikti urlaý qylmystaryn ashty», - dedi Shuǵyla Turlybek.

Sondaı-aq, ótken aptada ishki ister mınıstri Marat Ahmetjanov Senattyń jalpy otyrysynda Qylmystyq, Qylmystyq-protsestik jáne qylmystyq-atqarý kodeksterine ózgerister men tolyqtyrýlarǵa qatysty zań jobasyn usyndy.

Onda «azaptaý» uǵymy naqtylanady jáne alǵash ret qazaqstandyq zańnamaǵa «qatygezdik» anyqtamasy engiziledi.

Túzetýler alty baǵytqa baılanysty, osy ózgerister arqyly qylmystyq sot tóreligi salasynda adam quqyqtaryn iske asyrý tetikterin keńeıtý josparlanǵan.

Osyǵan baılanysty, jańa túzetýlerge oraı qatygezdik jasaǵany úshin quqyq buzýshylyq quramy arnaıy engiziledi.

Budan basqa, otbasylyq-turmystyq salada jasalatyn quqyq buzýshylyqtar quramyna «kinálige materıaldyq nemese ózge de táýeldiligi bar adamǵa qysym jasaýǵa qatysty» degen biliktilik belgileri engiziledi.

Osylaısha, qylmystyń aýyrlyǵy artyp, bas bostandyǵynan aıyrý sanktsııasy artady.