Eki kún dalada túnegen: Qyzylorda oblysynda ákesi men balasy tabyldy

QYZYLORDA. QazAqparat - Qyzylorda oblysynda eki kún buryn elsiz dalada joǵalyp ketken ákesi men balasy aman-esen tabyldy, dep habarlaıdy QazAqparat tilshisi.

Eske salsaq, eki kún buryn Jalaǵash aýdanyna qarasty Aqqyr aýyly aýmaǵynda eki adam joǵalyp ketken. Onyń biri 1981 jyly týǵan azamat bolsa, ekinshisi - onyń 9-10 jastaǵy balasy.

Oblystyq Tótenshe jaǵdaılar departamenti jedel qutqarý jasaǵy mamandary oqıǵa ornyna jetip, izdestirý jumystaryn bastap ketken bolatyn.

Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepovanyń habaralýynsha, qutqarýshylar elsiz dalada adasyp ketken azamattardy Aqqyrdan 45 shaqyrym qashyqtyqtan tapty.

Málim bolǵanyndaı, olar aýylǵa azyq-túlik alýǵa kelgen. Odan keıin 80 shaqyrym qashyqtyqta jatqan Túgisken ýchaskesindegi sharýashylyǵyna bet alǵan.

«Jolda jańbyr aralas qar jaýǵan. Osylaısha olar aýa raıynyń qolaısyz bolýynan mejeli jerden adasyp ketken. Saldarynan 16-17 qarasha kúnderi dalada yqtasyn oryndarǵa qonýǵa májbúr bolǵan», - dedi jedel qutqarý jasaǵynyń basshysy Danyshbaı Esemuratov.

Qutqarýshylar adasqan adamdardy búgin, 18 qarashada saǵat 13.50-de Tekeı degen aýmaqtan taýyp alǵan. Mamandar olardyń júrgen joldaryn barlaı otyryp izdestirý júrgizgen.