Eki birdeı qarjy pıramıdasyn qurǵandar sottaldy

ASTANA. QazAqparat – Elordada eki birdeı qarjy pıramıdasyn uıymdastyrǵan aıyptylarǵa qatysty sot úkimi shyqty, dep habarlaıdy QazAqparat tilshisi Astana qalalyq sotyna silteme jasap.

«2023 jylǵy 2 naýryzda Astana qalasy Saryarqa aýdanynyń №2 aýdandyq soty MMK Investment jáne Eden Life7 qarjy pıramıdalaryn uıymdastyrý faktisi boıynsha T. jáne S-ǵa qatysy aıyptaý úkimin shyǵardy. Olar 2020 jylǵy qarashadan 2022 jylǵy qańtar aıy aralyǵynda ózara sóz baılasý arqyly qarjy pıramıdalaryna basshylyq etken. T. men S. WhatsApp jáne Telegram arqyly ınvestıtsııalyq baǵdarlamalar týraly jalǵan aqparat taratyp, áleýetti salymshylardy kompanııalarǵa aqsha quıýǵa shaqyryp kelgen. Pıramıdaǵa tartylǵan qarajat somasy 718 mln teńgeden astam jáne 691 myń AQSh dollaryn qurady», - delingen sottyń habarlamasynda.

Saldarynan 34 adam 164 mln teńgeden astam somaǵa zardap shekken.

Prokýror T. jáne S-ny 8 jylǵa bas bostandyǵynan aıyrý jazasyn taǵaıyndaýdy surady.

«Óz kezeginde aıyptylar kinálaryn moıyndamady. Olardyń qorǵaýshysy qylmystyq isti toqtatýdy nemese bas bostandyǵynan aıyrýdan basqa jaza taǵaıyndaýdy surady», - deıdi sottan.

Al jábirlenýshiler kinálilerdi bas bostandyǵynan aıyra otyryp, keltirilgen zalaldy óndirýdi talap etken.

Aqparatta aıtylǵandaı, T. jáne S. kinási jábirlenýshiler men kýágerlerdiń aıǵaqtarymen, ekonomıkalyq saraptamalar jáne iske qatysty basqa materıaldar arqyly dáleldengen.

«Qylmystyń kodekstiń 217-babynyń 3-tarmaǵynyń 2) tarmaqshasynyń sanktsııasy kinálilerdiń múlkin tárkilep, 5 jyldan 12 jylǵa deıingi merzimge bas bostandyǵynan aıyrý jazasyn kózdeıdi. Jeńildetetin jáne aýyrlatatyn jaǵdaılar joq. Osylaısha T. 6 jylǵa bas bostandyǵynan aıyryldy. S. 65 jasta ekendigi men densaýlyq jaǵdaıyn eskere otyryp, 5 jylǵa bas bostandyǵynan aıyryldy. Sottalǵandar qarjy uıymdarynda 7 jyl merzimge deıin basshy laýazymyn atqarý quqyǵynan aıyryldy», - dep jazylǵan sot sheshiminde.

Sondaı-aq, sot aqparynda jekelegen jábirlenýshilerdiń zalaldy óndirip alý týraly talabynyń qanaǵattandyrylǵany jáne bir bóligi azamattyq sot isin júrgizý tártibimen júginý quqyǵyna sáıkes qaraýsyz qalǵany aıtylǵan.

Úkim zańdy kúshine engen joq.

Eske salsaq, byltyr shildede Astanada «Eden Life» qarjy pıramıdasyn qurýǵa qatysty qylmystyq is qozǵalǵan edi.

Odan bólek, Qarjylyq monıtorıng agenttiginen elordada MMK Investment qarjy pıramıdasyn uıymdastyrǵan kúdiktiniń qamaýǵa alynǵany habarlandy.