Eki aıda elimizdiń joldarynda 2,4 myń JKO tirkeldi

ASTANA. QazAqparat - QR Bas prokýratýrasy Quqyqtyq statıtıska jáne arnaıy esepke alý jónindegi komıtetiniń málimetine sáıkes, respýblıka boıynsha 2016 jyldyń 2 aıynda 2015 jyldyń sáıkes kezeńimen salystyrǵanda jol-kólik oqıǵasy 2,6 paıyzǵa ósti.

Elimizdiń joldarynda 2413 jol-kólik oqıǵasy bolyp, onda 3428 adam zardap shekken. JKO saldarynan 488 kámeletke tolmaǵan bala jaraqat alyp, olardyń 15-i qaza tapqan.

Jalpy, JKO-nyń 90 paıyzdan astamy Jol qozǵalysy erejelerin buzatyn júrgizýshilerdiń kinásinen bolady. Sonymen qatar, olardyń kinásinen 2286 apat jasalǵan, onyń ishinde 55 alkogoldik jáne esirtkilik mas kúıinde bolǵan júrgizýshilerdiń kinásinen oryn alǵan.

JKO-nyń kóbisi, ıaǵnı 751 oqıǵa, jyldamdyqty arttyrýdan boldy, sonyń saldarynan 98 adam qaza bolyp, 843-i jaraqattandy.

JKO-nyń 30 paıyzy Almaty qalasynda oryn alyp otyr. 2016 jyly bul aımaqta adamdardyń dene jaraqatyna jáne kisi ólimine alyp kelgen 837 JKO tirkelgen. Apattylyǵy az Soltústik Qazaqstan oblysy bolyp otyr, onda 27 JKO oryn alǵan.

Mańǵystaý, Batys Qazaqstan jáne Qostanaı oblystarynda JKO-nyń azaıǵany tirkeldi. Kerisinshe, Pavlodar jáne Aqmola oblystarynda jol-kólik oqıǵalarynyń birshama artqany baıqaldy.

Aıta keteıik, «Memlekettik quqyqtyq statıstıka jáne arnaıy esepke alý týraly» Qazaqstan Respýblıkasynyń Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń ólimine nemese jaraqattanýyna ákep soqqan jol-kólik oqıǵalaryn ǵana esepke alady.