Eki aıda 1,8 mln gektar jaıylym memleket menshigine qaıtaryldy

NUR-SULTAN. QazAqparat - Bıyldyń 2 aıynda shamamen 1,8 mln gektar jaıylym memleket menshigine qaıtaryldy. Bul týraly Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«2019 jyldyń ekinshi jartyjyldyǵynda jaıylymǵa túsetin júkteme normatıvteri men aýdandar, aýyldyq okrýgter, naqty sharýashylyqtar bólinisinde aýyl sharýashylyǵy janýarlarynyń sanyn salystyrý arqyly jaıylymdardyń paıdalanylýyna taldaý júrgizildi.

Taldaý kórsetkendeı, jumys istep turǵan sharýashylyqtarǵa 72,4 mln gektar jaıylym bekitilip berilgen, al olardyń jartysyna jýyǵynda jetkilikti mal basy jaıylmaıdy.

Qazirgi ýaqytta mınıstrlik oblys ákimderimen birlesip jaıylymdardy paıdalaný tıimdiligin arttyrý jumysyn júrgizýde. Qazirdiń ózinde nátıjeler bar» - dedi mınıstr Senatta agroónerkásiptik keshendi damytý taqyrybyna arnalǵan parlamenttik tyńdaýda.

Onyń sózine qaraǵanda, 2019 jyly memleket menshigine 1,1 mln gektar paıdalanylmaıtyn jaıylym qaıtarylsa, bıyldyń 2 aıynda shamamen 1,8 mln gektar jaıylym qaıtaryldy.

«Kórsetilgen jerler boıynsha olardy jańa jer paıdalanýshylarǵa qaıta bólip berý jáne aýyl sharýashylyǵy aınalymyna tartý jumysy júrgizilýde», - dedi Saparhan Omarov.