EQDB ShQO-daǵy qoǵamdyq kólikti jańartýǵa 9,6 mlrd teńge jumsaıdy

ÓSKEMEN. QazAqparat - Eýropalyq Qaıta qurý jáne damý banki Semeı men Óskemenge qaýipsizdik talaptaryna jaýap beretin zamanaýı, jaıly avtobýstardy satyp alý úshin nesıe qarajatyn bóledi. «Altai Invest-2016» halyqaralyq forýmynda óńirdiń osy eki iri qalalarynda qoǵamdyq kólikti jańǵyrtý týraly aldyn ala kelisimge qol qoıyldy, dep habarlady óńirlik «QazAqparat» HAA tilshisi.

Kelisimge búgin Qazaqstandaǵy EQDB dırektory Djanet Hekman men eki qalanyń ákimi qol qoıdy.

Taraptar bul jobalardy iske asyrý jolaýshylarǵa qyzmet kórsetý sapasyn arttyryp, GPS monıtorıng júıesin engizý arqyly jelide avtobýstar qozǵalysy turaqtylyǵyn baqylaýdy kúsheıtýge múmkindik beretinine senimdi. Kólikten basqa, dıspetcherlik basqarýǵa, GPS monıtorıngi úshin jabdyq jáne jolaqy tóleý júıesin satyp alýdy kózdeıdi.

 

Bank bólgen 9,6 mlrd teńge qarajattyń 5,1 mlrd teńgesi - Óskemenge, 4,5 mlrd teńgesi - Semeıge aýdaryldy.

Satyp alynatyn avtobýstardyń úlgisin tańdaý bankpen kelisim boıynsha ShQO ákimdiginiń talaptaryna sáıkes júzege asyrylady.

Eýropalyq Qaıta qurý jáne damý bankiniń dırektory Djanet Hekman bank ShQO jobalaryn qoldaıtynyn jáne óńirdiń ınnovatsııalyq múmkindikterin damytýǵa óz úlesin qosýǵa ázir ekenin atap ótti.

EQDB men ShQO ákimdigi arasyndaǵy yntymaqtastyq byltyrdan bastap retteledi. Búginde oblys ákimdiginiń EQDB-men jalpy ınvestıtsııalyq portfeli 245 mlrd teńgeni quraıdy.